काठमाडौं । निर्देशक निश्चल बस्नेतले हिन्दी चलचित्रलाई  सिनेमा हलले प्राथमिकता दिएको भन्दै असन्तुष्टि जनाएका छन् । उनले असन्तुष्टि जनाउँदै हलको विकल्प खोज्ने चेतावनी दिएका छन् । 

नेपाली चलचित्रको राम्रो प्रतिकृया, दर्शकको साथ र समीक्षा राम्रो भए पनि शो भने हलले हिन्दी सिनेमालाई दिएको आरोप लगाएका छन् । 

“राम्रो प्रतिकृया, दर्शकको राम्रो साथ, राम्रो अकुपेन्सी हुँदा पनि तपाइँहरू चाहिँ हिन्दी फिल्मलाई नै शो दिइराख्नु है,” निश्चल सामाजिक सञ्जाल फेसबुकमा लेख्छन्, “फिल्म ...जस्तो हुँदा पनि । म चाहिँ हलको विकल्पतिर लागेँ ।” 

निश्चलको लगानी तथा अभिनय रहेको चलचित्र ‘बेहुली फ्रम मेघौली’ अहिले पनि प्रदर्शनरत छ । यो चलचित्रमा निश्चल र स्वस्तिमा खड्का मुख्य भूमिकामा छन् । लगानी पनि उनीहरू दुवैको हो ।

गत वर्ष निश्चलको निर्देशन रहेको सिनेमा ‘दिमाग खराब’ प्रदर्शन हुँदा हलले ५० प्रतिशत सेयर नदिए सिनेमा नै उतार्ने चेतावनी दिएपछि प्रदर्शकहरू निर्मातालाई ५० प्रतिशत सेयर दिन तयार भएका थिए ।