काठमाडौं । पूर्वराजा ज्ञानेन्द्र शाहले भुटान भ्रमणका क्रममा आफूलाई गरेको सम्मानलाई सबै नेपालीलाई गरिएको आदरका रूपमा लिएको बताएका छन् । निर्मलनिवासमा शनिबार सर्वसाधारणलाई विजयादशमीको टीका लगाइदिने क्रममा सञ्चारकर्मीलाई संक्षिप्त प्रतिक्रिया दिँदै उनले यस्तो बताएका हुन् ।

केही दिनअघि मात्र आफू भुटान गएको र उक्त भ्रमण निजी रहेको उनले उल्लेख गरे । भुटान भ्रमणका बारेमा सबैको चासो र जिज्ञासा रहेको उनले बताए ।

“...अहिले हालै म भुटान गएको थिएँ । त्यसको अहिले चासो र जिज्ञासा भएको छ । त्यो निजी भ्रमण थियो,” उनले भने ।

• पूर्वराजा ज्ञानेन्द्रले सर्वसाधारणलाई लगाइदिए टीका

भुटानको राजपरिवार र त्यहाँका जनताले आफूलाई गरेको स्वागत, सम्मान र मित्रतालाई सम्पूर्ण नेपाली र नेपाललाई गरिएको आदरका रूपमा लिएको उनको भनाइ थियो ।

“त्यहाँका राजपरिवार र भुटानी जनताले मलाई दर्शाएको स्वागत, सम्मान, मित्रता – मैले के ठानेको छु भने, त्यो नेपाल र नेपालीलाई गरेको हो भनेर मैले ठानेको छु,” उनले भने, “तपाईंहरूमार्फत म त्यहाँको राजपरिवार र जनतालाई हृदयदेखि हार्दिक धन्यवाद, कृतज्ञता दिन चाहन्छु ।”

पूर्वराजा शाहले विजयादशमीको अवसरमा सम्पूर्ण नेपालीलाई शुभकामना पनि व्यक्त गरे । न्युज एजेन्सी नेपाल