काठमाडौं । चलचित्र ‘१२ गाउँ’ उत्साहजनक रूपमा चलिरहेको छ । बिहीबार फूलपातीको दिनदेखि प्रदर्शनमा आएको सिनेमाका दुवै दिन अधिकांश शो हाउसफूल भएको निर्माणपक्षले बताएको छ । 

“अधिकांश शो हाउसफूल भएका छन् । हमी हलहलमा पुगेर दर्शकको प्रतिक्रिया बुझिरहेका छौँ,” विरतक गोविन्द शाहीले भने । 

बिराज भट्टको निर्देशन रहेको चलचित्रमा समीर भट्ट मुख्य भूमिकामा छन् । समीरको यो डेब्यु मुभी छ । समीर बिराजका छोरा हुन् । सिनेमाको घोषणा देखि नै समीर चर्चामा छन् । जसका कारण यो चलचित्रले राम्रो हाइप पनि बनाएको थियो । 

दुई दिनमा यो चलचित्रकले कति ग्रसकलेक्सन गर्‍यो ? 
“हामीलाई बक्सअफिस रिपोर्ट आउनेक्रम जारी छ । सबै रिपोर्ट आइसकेको छैन । नियमित शो बाहेक पनि शो छन् । ती शोको टिकटको मूल्य कति छ, त्यो रेट हलले हामीलाई नपठाएसम्म ग्रसकलेक्सन यकिन हुँदैन,” वितरक शाहीले बाह्रखरीसँग भने, “त्यसैले अहिले नै यति भनेर भन्न सकिने अवस्था भएन । सबै हलको रिपोर्ट नआएसम्म यकिन हुँदैन ।” 

यकिन तथ्यांक नआए पनि हाउसफूल भएकाले राम्रो कलेक्सन भएको उनको भनाइ छ । 

‘१२ गाउँ’मा विराज भट्ट र समीर भट्ट मुख्य भूमिकामा छन् । न्यान्सी खड्कासँगै मुरलीधर, कनिज कोइराला, नरेन खड्का, दीया मास्के, कृष्ण भट्ट, सोनु चन्द्रपाल, कालु राना, अर्जुन जंग शाही, भिष्म जोशी, शुलेमान शंकर (इकु), तारा शर्मा, किशोर भट्ट, सन्तोष सरकार र स्टन्ट शिल्भाको अभिनय रहेको छ ।

विराज भट्ट फिल्म पोडक्सन प्रस्तुतिमा निर्माण भएको सिनेमामा अर्जुन पोखरेल र निरजको संगीत, रामजी लामिछाने, सुनिल क्षेत्री र कविराज गहतराजको कोरियोग्राफी तथा प्रवीन केएल र भुपेन्द्र अधिकारीको सम्पादन रहेको छ ।

सिनेमामा विराज स्वंयमको कथा र सन्तोष सरकारको पटकथा तथा संवाद लेखन रहेको छ । एक्सन–थ्रिलर कथामा बन्न लागेको सिनेमाका लागि विराजले भारतबाट द्वन्द्व निर्देशक ल्याएका छन् । तमिल तथा कन्नड सिनेमाका द्वन्द्व निर्देशक स्टन्ट सिल्भालाई नेपाली सिनेमा सफल द्वन्द्व निर्देशनमा शंकर महर्जनले सघाएका छन् ।

महेश पौडेल छायांकन रहेको सिनेमाको काठमाडौं, ललितपुर, विरगञ्ज र हेटौंडामा छायांकन गरिएको छ । सिनेमाको वितरण काफिया फिल्मस् र कुवेर सिने डिष्ट्रिव्युसनले गरेको छ ।