काठमाडौं । तलेजु भवानी मन्दिर वर्षको एक दिन बडादसैँको महानवमीमा मात्र सर्वसाधारणका निम्ति खुला गरिन्छ । त्यसैले महानवमीको दिन उक्त मन्दिरमा दर्शनार्थीको निकै घुइँचो लाग्ने गर्थ्यो । हनुमानढोका दरबार क्षेत्रमा रहेको तलेजु मन्दिरमा यसपालि भने दर्शनार्थीको घुइँचो गत वर्षको तुलनामा कम देखिएको छ ।

काठमाडौं महानगरपालिका–२४ का वडाध्यक्ष विनोदकुमार राजभण्डारीले यो वर्ष दर्शनार्थीको संख्या घटेको बताए । उक्त मन्दिर सोही वडामा पर्छ ।

उनका अनुसार, अघिल्लो वर्ष एक दिनमा पाँच लाख हाराहारीमा भक्तजनले दर्शन गरेका थिए । वडाध्यक्ष राजभण्डारीले भने, “यसपटक तिथि फरक परेका कारण दर्शनार्थी त्यति छैनन्, पोहोर साल भक्तजनको लाइन इन्द्रचोकसम्मै थियो । आज मखनटोलसम्म मात्र छ ।”

तलेजु भवानीलाई फूलपातीको दिनमा हनुमानढोका दरबारको मूलचोकमा ल्याइन्छ र विजयादशमीका दिन बिहान मात्र मूल मन्दिरमा फर्काइन्छ । राज्य सञ्चालनका निम्ति शक्ति प्राप्त होस् भन्ने संकल्पले महाअष्टमीको राति तान्त्रिक विधिबाट कालरात्रि पूजा गर्ने परम्परा छ ।

कालरात्रि पूजा गरी ५४ बोका र ५४ राँगाको बलि समेत् दिने चलन छ । तलेजु भवानीमा मात्र नभई यस दिन मुलुकभरका शक्तिपीठमा भक्तजनको घुइँचो लाग्ने गर्छ ।

वडाअध्यक्ष राजभण्डारीले भने, “अरू बेला पनि नित्यपूजा भइराख्छ । तर, आज सर्वसाधारणका लागि विशेष गरी खोलिने चलन छ । आज महिषासुरको वध गरेको दिन भनिन्छ, त्यसैले बलि पनि दिने गरिएको हो ।”

उक्त मन्दिर बिहान ४ देखि साँझ ६ बजेसम्म खोलिन्छ । दर्शनार्थीको भीड हेरेर मन्दिर खुल्ने समय बढाइने गरेको उनले बताए । रासस