काठमाडौं । चिनियाँ कम्युनिस्ट पार्टी (सीसीपी)ले नेपालका राजनीतिक दलमार्फत राहत सामग्री हस्तान्तरण गरेको विषय चर्चामा छ । बाढीपीडितका लागि सरकारमार्फत नभएर दलमार्फत राहत सामग्री बाँडिएको विषयले आलोचना खेपेको हो । दलहरू राहतका लागि हतारिएको भन्दै सामाजिक सञ्जालमा टीकाटिप्पणी भइरहेको छ ।

शुक्रबार काठमाडौंको टेकुस्थित महेन्द्र सरस्वती सेवा आधारभूत विद्यालयमा आयोजित कार्यक्रममा चिनियाँ कम्युनिस्ट पार्टीको अन्तर्राष्ट्रिय विभागले दलका नेताहरूलाई राखेर राहत सामग्री हस्तान्तरण गरेको हो । सीसीपीले एक करोड ९० लाख ७० हजार रुपैयाँको बराबरको चेक हस्तान्तरण गरेको हो ।

कार्यक्रममा नेपाली कांग्रेसका केन्द्रीय सदस्य मधु आचार्य, नेकपा (एमाले)का गोपाल खनाल, माओवादी केन्द्रका पोलिटब्युरो सदस्य सूर्य सुवेदी, नेकपा (एकीकृत समाजवादी)का उपमहासचिव रामकुमार भट्टराईलगायत थिए ।

चिनियाँ दूतावासले सामाजिक सञ्जालमार्फत राजनीतिक दलमार्फत राहत सामग्री वितरण गरिएकाे उल्लेख गरेको छ । “चिनियाँ कम्युनिस्ट पार्टीले दिएको बाढी राहत सामग्री हस्तान्तरण समारोह आज काठमाडौंमा सम्पन्न भएको छ । हालै आएको बाढी र पहिरोबाट प्रभावित घरपरिवारलाई १९ करोड ७० हजार नेपाली रुपैयाँ बराबरको चामल, कम्बल, खाद्यान्न प्याकेज र दैनिक उपभोग्य लगायतका राहत सामग्री नेपाली राजनीतिक दलहरूमार्फत वितरण गरिएकाे छ,” दूतावासले भनेको छ ।

तर, राहत सामग्री बुझेका नेताहरूले भने आफूहरू साक्षी मात्रै बसेको दाबी गर्छन् । राहत वितरण गरिने घर वडा अध्यक्षले नै निर्क्योल गर्ने बताइएको छ ।

“हामी दलका साक्षी हौँ । राहत सामग्री करिब १२ सय घरमा पुर्‍याउने भनिएको छ । १२ सय घरधुरी वडा अध्यक्षमार्फत छानिएर जान्छन् । ललितपुर र काठमाडौंका पीडितलाई वितरण गरिन्छ,” एकीकृत समाजवादीका कार्यालय सचिव समेत रहेका भट्टराई भन्छन् ।

माओवादीका पोलिटब्युरो सदस्य सुवेदी राजनीतिक दललाई दिएर त्यहाँबाट बाँड्ने भन्ने भ्रम नपार्न आग्रह गर्छन् । “राजनीतिक पार्टीलाई दिएर बाँड्ने भन्ने पहिलेको जस्तो भ्रम नपरोस् । हामी साक्षी बसेका हौँ । संस्थामार्फत राहत वितरण हुन्छ,” उनी भन्छन् ।

राज्यबाट नदिएर भूमिका नै नभएको ठाउँमा जान दलहरू हतारिएका हुन् त ? साक्षी बसेकामध्ये एक नेता भने आफूहरूलाई किन बोलाइयो भन्ने प्रश्न खडा भएको स्वीकार गर्छन् ।

“किन बोलाइयो भन्ने हामीलाई नै लागेको हो । अन्र्योल भएर हामी त गएर फर्कियौँ । राहत के भयो हामीलाई थाहा छैन । किन बोलाइयो भनेर बोल्न पनि मिलेन,” ती नेताले बाह्रखरीसँग भने ।