काठमाडौं । तेह्रथुमका दीपक सिलवालले शनिबारदेखि अनशन तोडेका छन् । हवाई एम्बुलेन्सको माग गर्दै विगत एक महिनादेखि उनी काठमाडौंको शान्तिवाटिकामा अनशन बसेका थिए ।

गृह मन्त्रालयका उपसचिव दिलकुमार तमाङ र सिलवालबीच पाँचबुँदे सहमति भएसँगै उनले अनशन तोडेका हुन् । गृह मन्त्रालयमा शनिबार आयोजित एक कार्यक्रमबीच गृहमन्त्री रमेश लेखकले उनलाई जुस पिलाएर अनशन तोडाए ।

कार्यक्रममा गृहमन्त्री लेखकले सिलवालले उठाएको विषय गम्भीर र महत्त्वपूर्ण रहेको बताए । सहमति कार्यान्वयनमा मन्त्रालय प्रतिबद्ध रहेको उनले उल्लेख गरे ।

सरकारको पनि ध्यानाकर्षण गराउने उद्देश्यका साथ अनशन बसेर सिलवालले लोकतन्त्रको असल अभ्यास गरेको भन्दै मन्त्री लेखकले प्रशंसा गरे । उनले भने, “आमाहरू, तिनका सन्तानहरूको जीवन जोगाउनका लागि जुन तपस्या गर्नुभयो र हामीलाई झक्झक्याउनुभयो र हाम्रो ध्यान गम्भीरतापूर्वक आकर्षण गराउनुभएको छ, तपाईंलाई धन्यवाद छ ।”

गृहमन्त्री लेखकले हाल सरकारले दिइरहेको सेवाले सबै ठाउँलाई समेट्न नसकिएको अवस्थामा त्यस्तो हुनु हुँदैन र पीडामा रहेका हरेकको उद्धार गर्नुपर्छ भनेर उनले राखेको माग जायज भएको पनि बताए । हवाई उद्धारसँग सम्बन्धित कार्यविधिलाई संशोधन गरेर सिलवालले उठाएको विषयलाई समावेश गरी अघि बढ्ने पनि उनले प्रतिबद्धता जनाए । उनले तोकतान्त्रिक ढंगले गरिएको सिलवालको दबाब शान्तिवादी अभ्यास भएको प्रतिक्रिया दिए ।

उक्त कार्यक्रममा गृह मन्त्रालयका सूचना अधिकारी तामाङले यसअघिको हवाई उद्धारको समीक्षा गरे । आपत्कालीन हवाई उद्धारलाई स्वास्थ्य तथा जनसंख्या मन्त्रालय, महिला, बालबालिका तथा ज्येष्ठ नागरिक मन्त्रालय र गृह मन्त्रालयले आवश्यक साधनस्रोत तथा प्रतिबद्ध संयन्त्रको व्यवस्थान गरी थप प्रभावकारी बनाउनेलगायत पाँचबुँदे सहमति भएको जानकारी दिए ।

हिजो (शुक्रबार)को छलफलबाट सहमति गरी शनिबार औपचारिक रूपमा हस्ताक्षर भएको उनले जानकारी गराए । उनले सहमतिसँगै आजैका मितिदेखि सिलवालको अनशन पनि अन्त्य भएको जानकारी दिए ।

कार्यक्रममा सिलवालले आफ्नो माग हवाई एम्बुलेन्स नै रहेको जानकारी दिए । उनले हालको हवाई उद्धार प्रभावकारी नभएको भन्दै गृहमन्त्री लेखकको ध्यानाकर्षण गराएका थिए । उनले सके हरेक प्रदेशमा एक/एक र नसके कम्तीमा चार ठाउँमा हवाई एम्बुलेन्स राख्न जरुरी रहेको औँल्याए ।

उनलाई सहयोग गर्दै आएका पूर्वप्रदेश सांसद नरोत्तम वैद्यले तत्काल कार्यविधि संशोधन गरेर हवाई उद्धार प्रभावकारी बनाउनुपर्ने बताए । यो सहमति कागजमा मात्र सीमित हुन नहुनेमा उनले जोड दिए । रासस