काठमाडौं । राष्ट्रिय स्वतन्त्र पार्टी (रास्वपा)का सभापति एवं सांसद रवि लामिछानेले विपद्‌मा सरकारको उपस्थिति कमजोर रहेको बताएका छन् । पर्याप्त पूर्वतयारी नगरिएको उनले आरोप लगाए ।

प्रतिनिधिसभाअन्तर्गतको राज्यव्यवस्था तथा सुशासन समितिको मंगलबारको बैठकमा उनले गृहमन्त्री रमेश लेखकले ‘समाचार सुनाएको’ टिप्पणी गरे । बैठकमा उनले बोल्नुअघि गृहमन्त्री लेखकले हालैको अविरल वर्षासँगैको विपद्, त्यसमा सरकारको कार्यबारे जानकारी गराएका थिए ।

प्रधानमन्त्री र मन्त्रीले कमजोरी स्वीकार गर्नुपर्नेमा उनले जोड दिए । “भएको स्रोतसाधनको कमी भएको कि व्यवस्थापन नभएको ? काठमाडौंको भिजिबिलिटी कति थियो थाहा छ ? रेस्क्युमा हेलिकोप्टर उडानका लागि भिजिबिलटी थिएन भन्नुभयो,” उनले भने, “प्रधानमन्त्रीजीले पहिरो जाने कसरी थाहा हुन्छ भन्नुभयो । तयारी गर्न सकिएन भनेर स्वीकार गर्नुपर्‍यो ।”

विपद्का बेला जिम्मेवार निकायका प्रमुख एवं पदाधिकारी देशभित्र नभएको भन्दै उनले असन्तुष्टि जनाए । “प्रहरी प्रमुख कहाँ हुनुहुन्छ ? न्यूनीकरण प्राधिकरण प्रमुख कहाँ हुनुहुन्थ्यो ? प्रधानमन्त्रीले तामपत्र उद्घाटन गर्ने बेला थियो ?,” उनले प्रश्न गरे ।

उनले नेपाली कांग्रेसतर्फ संकेत गर्दै ठूलो पार्टी सरकारमा रहँदा शान्त हुने बताए । त्यसले देशका निम्ति घाटा हुने उनको भनाइ थियो ।

कांग्रेस सांसद सरिता प्रसाईंले विपद् व्यवस्थापनमा सरकार चुकेको टिप्पणी गरिन् । “व्यवस्थापनमा सरकार चुक्यो । किन गााडी आउन दे’को ? बाटोमा रहेका मान्छेलाई कसरी रेस्क्यु गर्ने सरकारले सोचोस्,” उनले भनिन् ।

प्रधानमन्त्रीले जिम्मेवार भएर बोल्नुपर्नेमा उनले जोड दिइन् । “प्रधानमन्त्री त्यसरी बोल्न हो ? मल्हमपट्टी लगाउने किसिमले जिम्मेवार व्यक्तिले बोल्नुहोस्,” उनले भने ।