मकवानपुर । वर्षासँगै पहिरो खसेर अवरुद्ध भएका मध्ये मकवानपुरका हेटौँडा–काठमाडौं र हेटौँडा–धरान चतरा जोड्ने तीन सडक सञ्चालनमा ल्याइएको छ ।

जिल्ला प्रहरी कार्यालय मकवानपुरका अनुसार, सडकबाट पहिरो पन्छाएर त्रिभुवन लोकपथअन्तर्गत हेटौँडा–भैँसे, सिमभन्ज्याङ–पालुङ–नौबिसे र मदन भण्डारी लोकमार्गअन्तर्गत हेटौँडा–सिन्धुली–धरान चतरा सडक सोमबार बिहानदेखि खुलाइएको छ ।

यस्तै, त्रिभुवन लोकपथ सडकअन्तर्गत हेटौँडा–भैँसे–चित्लाङ–चन्द्रागिरि–काठमाडौं जाने सडक आइतबार साँझबाट एकतर्फी रूपमा सञ्चालनमा ल्याइएको थियो । वर्षासँगै खसेको पहिरो पन्छाएर ती सडक सञ्चालनमा ल्याइएको जिल्ला प्रहरी कार्यालयका निमित्त प्रवक्ता एवं प्रहरी निरीक्षक ठाकुरप्रसाद सापकोटाले जानकारी दिए ।

उक्त सडकअन्तर्गत मकवानपुरको थाहा नगरपालिका–५, दामनमा पहिरो जाँदा सडक अवरुद्ध भएको थियो । कान्तिलोकपथ सडकको बकैया गाउँपालिका–१२, घट्टेपाखा र ११ नम्बर वडाको लाम्राङ, आँपचौरमा पहिरोका कारण र भीमफेदी गाउँपालिका–८ स्थित वाग्मती खोलाको पुल कटान भएकाले सडक अझै पूर्ण रूपमा अवरुद्ध छ ।

दक्षिणकाली–छैमले–सिस्नेरी सडकअन्तर्गत इन्द्रसरोवर गाउँपालिका–३, रामचन्द्र भन्ज्याङमा पहिरो खसेर कुलेखानी–फाखेल–फर्पिङ बाटो पूर्ण रूपमा अवरुद्ध रहेको प्रहरी निरीक्षक सापकोटाले बताए ।

दक्षिणकाली–छैमले–सिस्नेरी सडकखण्डकै इन्द्रसरोवर गाउँपालिका–२, सिमखोलास्थित लच्कामा सिमखोलमा आएको बाढीले कटान गरी कुलेखानी–सिस्नेरी–फर्पिङ बाटो पूर्ण रूपमा अवरुद्ध भएको प्रहरीले जनाएको छ ।

कुलेखानी–मार्खु भित्री सडकखण्डको इन्द्रसरोवर गाउँपालिका–१, सिम्लाङमा पहिरोका कारण थानकोट–कुलेखानी बाटो पूर्ण रूपमा अवरुद्ध छ ।

भीमफेदी गाउँपालिका–४, रातोमाटे, भीमफेदी–६, ढोकाफेदीमा पहिरो खसेर हेटौँडा–कुलेखानी जोड्ने बाटो पूर्ण रूपमा अवरुद्ध रहेको प्रहरी निरीक्षक सापकोटाले जानकारी दिए । अवरुद्ध अरू सडकमा पनि पहिरो पन्छाउने कार्य भइरहेको उनले बताए । रासस