सिड्नी । नेपाली गायक रामकृष्ण ढकालले शनिबार सिड्नीमा सांगीतिक प्रस्तुति दिएका छन् । शनिबार रातिसम्मै ढकालले गीत संगीतप्रेमीमाझ आफ्ना डेढ दर्जन लोकप्रिय गीत गाएका थिए । दर्शकको अनुरोधमा उनले स्वरसम्राट नारायण गोपालका केही गीत पनि गाए ।

पाल्पा सर्भिसेजको आयोजनामा अस्ट्रेलिया भ्रमणमा आएका ढकालले 'बिहान उठ्ने बित्तिकै हिमाल देख्न पाइयोस्' बोलको देशभक्ति गीत गाएर प्रस्तुति सुरु गरेका थिए । ढकालले लता मंगेशकरसँग गाएको 'बाचुन्जेलीलाई', 'ओराली लागेको हरिनको ताल भो'लगायत चर्चित गीत गाए ।

एटूजेड क्लिनिङ सप्लायर्सको मुख्य प्रायोजनमा सञ्चालित कार्यक्रममा ढकालले मध्यरातसम्मै प्रस्तुति दिए । उनले अन्तिमसम्मै दर्शकको राम्रो साथ पाएका थिए ।

कार्यक्रममा पुगेकामध्येका सिड्नीका तेज कवे भन्छन्, "गीत संगीतका पारखीका लागि ढकालको कर्णप्रिय आवाजले छुन्छ । बुरुकबुरुक उफ्रने पुस्ताका लागि यो पुरानो गीत होला, तर हाम्रा लागि यो महत्त्वपूर्ण क्षण हो ।"

सिड्नीको रकडेलस्थित इन्द्रेणी फङ्सन सेन्टरमा आयोजित कार्यक्रममा एनआरएन अस्ट्रेलियाले ढकाललाई सम्मान पनि गरेको थियो । एनआरएन ओसेनिया संयोजक दिनेश पोखरेल, एनआरएनका न्यू साउथवेल्स संयोजक विनोद कुवँर, सचिव कल्याण खड्काले ढकाललाई खादा र सम्मानपत्रसहित सम्मान गरे ।

समारोहमा ढकालले आफ्नो नया गीत 'जीवनको हिसाब'को लोकापर्णसमेत गरे ।

एनआरएन ओसेनिया संयोजक दिनेश पोखरेल र गायक रमन रेग्मी, सञ्चारकर्मी माधव गैरैले संयुक्तरूपमा भिडियो क्लिक गरेर शुभारम्भ गरेका थिए ।

यसपछि ढकालले न्युक्यासल, सिड्नीकै ग्रानभिलस्थित रातोघर, ब्रिसबेन, एडिलेडलगायत सहरमा प्रस्तुति दिने आयोजक सुवास थापाले बताए ।