काठमाडौं । नेपाल स्रष्टा समाजको १८औँ साधारणसभा तथा १०औँ अधिवेशन सम्पन्न भएको छ । शनिबार काठमाडौंमा सम्पन्न समाजको साधारण सभाले महासचिवको प्रगति प्रतिवेदन तथा कोषाध्यक्षको आर्थिक प्रतिवेदनलाई सर्वसम्मतरूपमा पारित गरेको छ ।

सभाले विधान संशोधन समितिले पेस गरेको संशोधन प्रस्ताव पनि पास गर्‍यो । 

अधिवेशन उद्घाटन कार्यक्रमका प्रमुख अतिथि नेपाल प्रज्ञा प्रतिष्ठानका पूर्व कुलपति कवि बैरागी काइँलाले नेपाली साहित्यको उत्थान र विकासमा समाजले थुप्रै काम गरेको बताए । उनले समाजले विदेशमा साहित्यिक र संस्कृतिको सम्बन्ध मजबुत बनाउन विविध काम गर्दै आएकोमा खुसी व्यक्त गरे ।

कार्यक्रममा सहभागी विदेशी पाहुना नेपाल बंगलादेश फ्रेन्डसिप सोसाइटीका अध्यक्ष लायन मसुर मोहम्मदले दुई देशको भाषा साहित्यमा अनुभवको आदानप्रदान सहित भाषा साहित्यमा सहकार्य भइरहेको बताए ।

त्यस्तै, बंगलादेशका पूर्वराजदूत तथा अनुवादक एवं लेखक मसुद मननले नेपाल र बंगलादेशबीच भएको धार्मिक, सांस्कृतिक, भाषा साहित्यका बीचमा समानता रहेको धारणा राखे ।

कार्यक्रममा वरिष्ठ साहित्यिक पत्रकारहरू रोचक घिमिरे, नगेन्द्रराज शर्माले समाजको कामको प्रशंसा गर्दै शुभकामना व्यक्त गरे ।

शनिबार सम्पन्न अधिवेशनले आगामी दुई वर्षका लागि साहित्यकार श्रीओम श्रेष्ठ ‘रोदन’लाई अध्यक्ष पदमा निर्विरोध पुनः निर्वाचित गरेको छ ।

अधिवेशनले समाजको उपाध्यक्षमा डा. सदानन्द कडेल, महासचिवमा देविका तिमिल्सिना, कोषाध्यक्षमा तारा सुवेदी, सचिवमा प्रकाश घायल र सदस्यहरूमा मधु पाठक, माधव बिडारी, रञ्जना निरौला, डा. शान्तिमाया गिरीलाई पनि निर्विरोध निर्वाचित गरेको छ ।