काठमाडौं । विभिन्न किसिमका सरकारी सेवा सहजै उपलब्ध गराउने गरी सञ्चालनमा आएको नागरिक एपमा सवारीचालक अनुमतिपत्र (लाइसेन्स) सम्बन्धी विवरण थपिएको छ । नागरिक एप अपडेट गर्दा वा डाउनलोड गर्दा लाइसेन्ससँगै क्यूआर पनि देखिने भएको छ । 

त्यसबाहेक ट्राफिक नियम उल्लंघन गरेको विवरण समेत सवारी चालक अनुमतिपत्रको सेक्सनभित्र देखिने भएको छ ।

यातायात व्यवस्था विभागलाई लाइसेन्स छाप्न जटिलता भइरहेका बेला अब अनलाइनबाटै ‘डिजिटल लाइसेन्स’लाई ट्राफिक प्रहरीले अनुमति दिने गरी प्रक्रिया अघि बढेको छ । नागरिक एपमा लाइसेन्ससँगै देखिने क्यूआरलाई ट्राफिक प्रहरीले आफूसँग भएको एपमार्फत स्क्यान गरेर पूर्ण विवरण प्राप्त गर्नसक्ने भएको हो ।

प्रहरीले सहजै लाइसेन्स जाँच गर्न पाउने र नियम उल्लंघन गरेको विवरणलगायत जानकारी हेर्न सक्नेछ । यो सञ्चालनमा आएपछि ट्राफिक नियम उल्लंघन गरेकै ठाउँबाट अनलाइनमार्फत जरिबाना तिर्न सकिने व्यवस्था समेत नागरिक एपमार्फत उपलब्ध हुने गरी काम भइरहेको छ ।

काठमाडाैं उपत्यका ट्राफिक प्रहरी कार्यालयका प्रमुख प्रहरी नायव महानिरीक्षक (डीआईजी) भरतबहादुर बोहराले अनलाइनबाटै लाइसेन्स जाँच गर्ने व्यवस्थाको अहिले परीक्षण भइरहेको बताए । 

“अहिले यसको परीक्षण भइरहेको छ । चाँडै नै औपचारिक रूपमा यो घोषणा भएर लागुहुन्छ, त्यसपछि अनलाइनबाटै जरिबाना तिर्न सकिने सुविधामा काम हुन्छ,” डीआईजी बोहराले भने ।

नागरिक एपको विकासमा काम गरिरहेका एक अधिकारीले डिजिटल लाइसेन्सलाई नै प्रयोगमा ल्याउने गरी भइरहेको काम अन्तिम चरणमा पुगेको बताए । उनका अनुसार परीक्षण सफल भएसँगै औपचारिक रूपमै यसले मान्यता पाउनेछ ।

नागरिकलाई हातहातमै सरकारी सेवा उपलब्ध गराउने भन्दै सरकारले सार्वजनिक गरेको नागरिक एपबाट विभिन्न सरकारी निकायको सेवा लिनसक्ने र विवरण प्राप्त गर्नसक्ने व्यस्था छ । अहिले नागरिक एपमा विभिन्न सेवा थपिने काम भइरहेको ती अधिकारीले बताएका छन् ।