विराटनगर । कोसी प्रदेश योजना आयोगमा नेकपा (माओवादी केन्द्र)को ‘कोटा’बाट नियुक्त भएका दुई सदस्यले राजीनामा दिएका छन् । सदस्यहरू नमिता न्यौपाने र भवानीप्रसाद बरालले प्रदेश सरकारसमक्ष आफ्नो पदबाट राजीनामापत्र बुझाएका हुन् ।

उनीहरूलाई प्रदेश मन्त्रिपरिषद्ले गएको जेठ २८ गते उक्त सदस्यमा नियुक्त गरेको थियो । “पदमा रही कार्य गर्न असमर्थ रहेको जानकारी गराउँदै प्रदेश योजना आयोगको सदस्य पदबाट संयुक्त रूपमा राजीनामापत्र चढाउँदछौँ,” सदस्यद्वयको पत्रमा उल्लेख छ ।

माओवादी कोटाबाट नियुक्त विभिन्न निकायका पदाधिकारीले नयाँ सत्ता गठबन्धनपछि राजीनामा दिएका छन् ।