काठमाडौं । सरकारी निकायहरूलाई खरिद गरेका सफ्टवेयरको सेवा आफ्नै कर्मचारीबाट दिने गरी व्यवस्था गर्न सचिवस्तरीय बैठकले निर्देशन दिएको छ । सचिव बैठकको सोमबारको निर्णयले सबै मन्त्रालय, विभाग तथा कार्यालयहरूलाई खरिद गरेका सफ्टवेयरको सोर्स कोड प्राप्त गरी आफ्नै कर्मचारीबाट सेवा दिने गरी परिमार्जन, निमार्ण तथा इन्टिग्रेसनको काम गर्न निर्देशन दिएको हो ।

यसका लागि सबै निकायलाई आवश्यक समन्वय सञ्चार मन्त्रालयले गर्ने निर्णय बैठकले गरेको छ । “प्रविधिको उपयोग हुने भएकाले प्राविधिक जनशक्ति थप गर्ने गरी एक महिनाभित्र संगठन तथा व्यवस्थापन सर्वेक्षण गर्नुपर्ने,” बैठकको निर्णयमा उल्लेख छ ।

विभिन्न सरकारी निकायले खरिद गरेका करोडौँका सफ्टवेयरको मर्मतसम्भारका नाममा वार्षिक लाखदेखि करोड रुपैयाँसम्म विदेशी कम्पनीहरूलाई जाने गरेको छ । कतिपय महत्त्वपूर्ण सरकारी निकायका सफ्टवेयरको सोर्स कोडसमेत सरकार आफैँसँग छैन । यस्तोमा सचिव बैठकले यी दुवै काम गर्न सरकारी नियकाहरूलाई निर्देशन दिएको हो ।

सचिवस्तरीय २४ बुँदे निर्णयमा एक महिनाभित्र सिंहदरबार प्रवेश गर्दा ई–पास प्रणाली सञ्चालनमा ल्याउनसमेत भनिएको छ । यसका लागि गृह मन्त्रालयलाई सहरी विकास मन्त्रालय र सञ्चार तथा सूचना प्रविधि मन्त्रालयसँग समन्वय गर्न भनिएको छ ।