काठमाडौं । राष्ट्रिय प्रजातन्त्र पार्टी (राप्रपा)का नेता प्रकाशचन्द्र लोहनीले देश आर्थिकरूपले संकटमा जाने अवस्थामा रहेको बताएका छन् । मंगलबार पार्टीको आन्दोलन केन्द्रित प्रशिक्षण कार्यक्रममा लोहनीले कर्मचारीलाई तलब दिनसमेत नपुग्ने अवस्थामा पुगेको बताए ।

"जनतालाई गर्नुपर्ने लगानीको खर्च घटेर गयो । फाल्तु खर्च, साधारण खर्च, टीएडीए खर्च, प्रशासन खर्च व्यापक बढेर गयो । त्यसले गर्दा नेपालीहरूले पठाएको राजस्वबाट नेपालले विकास गर्ने मौका थियो, त्यो मौका खेर गयो । त्यो मौकाको उपयोग भएन । जसले गर्दा आज यो सरकारलाई कर्मचारीको तलब दिन पनि पुग्ने अवस्था छैन," उनले भने ।

उनले ठूला राजनीतिक दलहरूले देशलाई माग्नेको स्थितिमा पुर्‍याएको आरोप लगाए । उनले देशको अवस्थामा परिवर्तन गर्न वर्तमान शीर्ष राजनीतिक दलका नेताहरूबाट सम्भव नहुने बताए ।

"माग्ने भएर टोपी थापेर जानेबाहेक के छ ? अरू देशहरूले देखेका छन्, हाम्रो स्थिति । अरू देशहरूले बुझेका छन् । १९७० को दशकमा बंगलादेशलाई भन्थे, यो संसारको माग्ने हो भन्थे त्यही माग्नेको स्थितिमा हामीलाई यिनीहरूले पुर्‍याएका छन्," उनले भने ।

लोहनीले देशको अस्तित्व बचाउन अभिभावकीय भूमिकामा राजसंस्थालाई राख्नुपर्ने जिकिर गरे । उनले राजसंस्थालाई सक्रियरूपमा नभई संविधानभित्रको राजसंस्थाको रूपमा अभिभावकीय रूपमा राख्नु उपयुक्त हुने बताए ।