काठमाडौं । सरुवा अवधि पुगेका प्रहरी नायव उपरीक्षक (डीएसपी)को प्रक्रिया लम्बिएको छ । भदौ १५ गतेभित्रै हुनुपर्ने डीएसपीको सरुवा करिब एक महिना ढिला हुँदा समेत सरुवा हुन नसकेको हो ।

प्रहरी नियमावलीअनुसार प्रहरी अधिकारीको सरुवा अवधि एक वर्ष हुने व्यवस्था छ । यसलाई प्रहरी प्रधान कार्यालयले क्यालेन्डर नै बनाएर नियमित गर्दै आएको थियो । तर, अवधि पुगेका डीएसपीहरूको सरुवा भने अझै हुन सकेको छैन । 

प्रहरी प्रधान कार्यालयका अनुसार करिब ४० प्रहरी युनिटका इन्चार्जहरूको हेरफेर हुनेछ । त्यसमध्ये केही जिल्ला प्रहरी प्रमुख समेत फेरिने छन् । प्रहरी स्रोतका अनुसार आकर्षित जिल्ला र युनिटमा जान डीएसपीहरूले प्रधानमन्त्री कार्यालयदेखि गृह मन्त्रालयमार्फत तीव्र दबाब दिएपछि प्रहरी प्रधान कार्यालयले सरुवा नै रोकेको हो ।

करिब ४० ठाउँका लागि सयभन्दा बढी डीएसपी तीव्र प्रतिस्पार्धामा छन् । गएको वर्ष भदौ १५ मा नै डीएसपीहरूको सरुवा भएको थियो । 

१६ जिल्ला प्रहरी प्रमुखसहित उपत्यकाका ६ वटा प्रहरी वृत्तका डीएसपीको सरुवा अवधि पुगेको प्रहरी प्रधान कार्यालयले जनाएको छ । 

जिल्लाहरूमा दार्चुला, डडेल्धुरा, बैतडी र बाजुराका प्रहरी प्रमुखको सरुवा अवधि पुगेको हो । यसरी नै मुगु, कालीकोट, अर्घखाँची, पर्वत, प्युठान, मुस्ताङ, मनाङ र लमजुङ प्रहरी प्रमुख समेत फेरिने छन् । त्यस्तै पाँचथर, संखुवासभा, भोजपुर र खोटाङ प्रहरी प्रमुखको समेत सरुवा अवधि पुगेको हो । जिल्लाबाहेक उपत्यकाकै प्रहरी वृत्त दरबारमार्ग, गौशाला, बौद्ध, बानेश्वर र स्वयम्भु प्रहरी प्रमुख फेरिने छन् ।

भक्तपुरको जगती प्रहरी वृत्तका डीएसपीको समेत सरुवा अवधि पुगेको छ । जिल्लाहरूमा खोटाङ, अर्घखाँची, डडेल्धुरा र पर्वत जान अधिकांश डीएसीहरूको तीव्र लबिङ छ ।

त्यस्तै, काठमाडौंको दरबारमार्ग, बौद्ध र गौशला तथा भक्तपुरको जगती जान समेत डीएसपीहरूले शक्तिकेन्द्रमार्फत प्रहरी महानिरीक्षकलाई दबाब दिएका छन् ।

प्रहरी नियमावलीअुनसार एसपीभन्दा तलका प्रहरी कर्मचारीहरूको सरुवा र बढुवाको अधिकार प्रहरी महानिरीक्षकलाई दिइएको छ । तर, शक्तिकेन्द्रको दबाबका कारण प्रहरी महानिरीक्षक आफैँले उक्त अधिकार प्रयोग गर्न भने पाएका छैनन् ।