सेहरी (नवलपुर) । नवलपुरमा गण्डकी प्रदेशका मुख्यमन्त्री सुरेन्द्रराज पाण्डेले ‘सरसफाइ प्रवर्धन तथा जैविक मल उत्पादन केन्द्र र थारु जनजातिको परम्परागत ‘भोदी खेल तथा झम्टा सांस्कृतिक महोत्सव २०८१’ उद्घाटन गरेका छन् ।

मंगलबार भएको कार्यक्रमको उनले उद्घाटन गर्दै गण्डकी प्रदेशमा मध्यविन्दु नगरपालिका एक उत्कृष्ट स्थानीय तह भएको बताउँदै यस क्षेत्रको विकासका लागि आफूले पहल जारी राख्ने बताए ।

कार्यक्रममा नगरपालिकाका प्रवक्ता सुमनराज रेग्मीले आफ्ना १५ वडा वडाबाट फोहोर संकलन थालेको बताएका थिए ।

“नगरपालिकाको निर्माण तथा व्यवस्थापन गरेको यो नेपालको पहिलो जैविक मल उत्पादन केन्द्र हो । हामीले प्रत्येक घरबाट कुहिने तथा नकुहिने फोहोर छुट्याएर संकलन गर्छौँ । कुहिनेलाई जैविक मल बनाउँ नकुहिनेलाई कवाडीजन्यमा वर्गीकरण गरेर बेच्छौँ,” उनले भने ।

नकुहिने फलाम प्लाष्टिक जस्ता फोहोरलाई कम्प्याक्ट गरेरु बेच्न थालेको छ । कुहिने फोहोर भने कमै संकलन हुने नगरपालिकाले जनाएको छ । किसानसँग गोबर पनि किन्ने गरेको छ भने डढेलो नियन्त्रण गर्न पनि जंगलका सुकेका पात पतिंगर संकलन गरेर जैविक मल उत्पादन गर्ने गरेको छ ।

कार्यक्रममा गण्डकी प्रदेशकी कृषि तथा सहकारी मन्त्री पद्मा जीसी श्रेष्ठ, सांसदहरु, स्थानीय तहका नेता कार्यकताको उपस्थिति रहेको थियो ।  मध्यविन्दु नगरपालिकाका मेयर भिमलाल अधिकारीले उत्पादन केन्द्रको महत्व दीर्घकालीन वातावरणीय फाइदाबारे प्रकाश पारेका थिए ।