काठमाडौं । राष्ट्रिय स्वतन्त्र पार्टी (रास्वपा)को प्रथम राष्ट्रिय भेला आजदेखि सुरु भएको छ । काठमाडौंको कमलादीस्थित नेपाल प्रज्ञा–प्रतिष्ठानमा पार्टी सभापति रवि लामिछानेले भेलाको उद्घाटन गरेका प्रवक्ता मनीष सुमनले जानकारी दिए ।

भेला भोलिसम्म चल्नेछ । भेलामा सभापति लामिछानेले राजनीतिक र कार्यवाहक महामन्त्री एवं संगठन विभाग प्रमुख कविन्द्र बुर्लाकोटीले सांगठनिक प्रतिवेदन पेस गर्नेछन् ।

विधान संशोधन, विचार, संगठन, संसदीय मामिला, अभियान, उमेदवार क्लब/लिडरसिप एकेडेमीलगायत एजेन्डामा भेलामा छलफल गरिनेछ ।

राष्ट्रिय अभियान पनि घोषणा गर्दै भेलाबाट महाधिवेशनको मिति तय गरिनेछ । भेलामा देशभरबाट एक हजार ५०० भन्दा बढी प्रतिनिधि सहभागी रहेका रास्वपाले जनाएको छ ।