काठमाडौं । नेकपा (एमाले)की राष्ट्रियसभा सदस्य भगवती न्यौपानेले संविधानले ‘जनयुद्ध’ नचिन्ने बताएकी छन् । सोमबार राष्ट्रियसभा बैठकमा उनले यस्तो बताएकी हुन् ।

संविधानले सशस्त्र द्वन्द्वलाई चिन्ने उनले उल्लेख गरिन् । संविधानले चिनेको शब्द भनिनुपर्नेमा उनले जोड दिइन् ।

पार्टीका कार्यक्रम, दस्ताबेजमा लेख्ने विषय छुट्टै भएको भन्दै उनले संविधानले चिनेको कुरा मात्र संसद् बैठकमा बोल्नु उचित हुने धारणा व्यक्त गरिन् ।

“अहिले धेरैपटकसम्म यो जनयुद्ध हो कि होइन, जनयुद्ध, हिंसा भन्ने विषयमा धेरै बहस चलेको पायौँ । हामीले संविधानले के चिन्छ, त्यही कुरा बोल्ने र गर्ने हो । संविधानले जनयुद्ध भनेर चिन्दैन । संविधानले चिनेको भनेको सशस्त्र द्वन्द्व हो,” उनले भनिन् ।

सांसद न्यौपानले चाडबाडलक्षित अनुगमनलाई प्रभावकारी बनाउन आग्रह गरिन् । न्युज एजेन्सी नेपाल