काठमाडौं । प्रधानमन्त्री केपी शर्मा ओलीले वि.सं. २०८१ भित्र नेपाललाई सडक बालबालिकामुक्त राष्ट्र बनाउने अठोट व्यक्त गरेका छन् ।

नेपाल बाल संगठनद्वारा ६०औँ राष्ट्रिय बाल दिवसका अवसरमा शनिबार प्रधानमन्त्रीको निवास बालुवाटारमा आयोजित कार्यक्रममा उनले अझै ठूलो संख्यामा बालबालिका बेसहारा र अभिभावकविहीन रहेका उल्लेख गरे । उनले शिक्षा र स्वास्थ्यका अवसरबाट वञ्चित भएको अवस्थामा यस्तो स्थितिलाई बदल्न सरकारले संकल्प गरेको स्पष्ट पारे ।

प्रधानमन्त्री ओलीले ‘बालबालिकामा लगानी : सुनिश्चित भविष्यको थालनी’ नारालाई सार्थक बनाउनुपर्नेमा जोड दिए । बालबालिकाले हप्कीदप्की, नियन्त्रण र बन्धनमा होइन, उन्मुक्तिमा बाँच्न पाउनुपर्ने उनले बताए ।

उनले संयुक्त राष्ट्रसंघको बालअधिकारसम्बन्धी महासन्धि र नेपालको संविधानको मौलिक हकको कार्यान्वयन गर्दै बेसहारा बालबालिकालाई अभिभावकत्व दिएर हेरचाह गर्नुपर्ने बताए ।

“बाल्यकालदेखि नै बालबालिकाले असुरक्षाबाट ग्रस्त हुने स्थिति हुनु हुँदैन । अहिलेको सरकार बालअधिकार सन्दर्भमा होसियार छ । अघिल्लोपटक म प्रधानमन्त्री हुँदा बालबालिका अभिभावकविहीन भएर कोही बालबालिका सडकमा रहन सन्दैन भनेर भनेको थिएँ,” उनले भने, “उनीहरूले आफ्नो नैसर्गिक अधिकारलाई अनुहारमा मुस्कानसहित उपभोग गर्न पाउनुपर्छ । भविष्यका कर्णधार बालबालिकामाथि आर्थिक स्थिति कमजोर भए पनि सरकारले लगानी गर्छ । उनीहरूको हितमा सुधार ल्याउन ठोस कदम चाल्नैपर्छ ।”

कार्यक्रममा दिवसका अवसरमा आयोजित विभिन्न प्रतियोगितामा विजयी विद्यार्थीलाई पुरस्कार र प्रमाणपत्र वितरण गरिएको थियो ।

कार्यक्रममा प्रथम महिला राधिका शाक्य, राष्ट्रिय बालअधिकार परिषद्का सदस्यसचिव इन्दिरादेवी ढकाल, बाल संगठनका अध्यक्ष विद्या न्यौपानेलगायत व्यक्ति सहभागी थिए । रासस