काठमाडौं । भारतको सर्वोच्च अदालतले दिल्लीका मुख्यमन्त्री अरविन्द केजरीवाललाई जमानत दिएको छ ।‍ शुक्रबार सर्वोच्चका न्यायाधीशद्वय सूर्यकान्त र उज्ज्वल भुइँको इजलासले मुख्यमन्त्री केजरीवाललाई १० लाख धरौटीमा रिहा गर्न आदेश दिएको हो ।

केजरीवालले सर्वोच्च अदालतमा दुईवटा रिट निवेदन दायर गरेका थिए । यसमा एउटा निवेदन जमानत नदिनेविरुद्ध थियो । अर्को सीबीआईको गिरफ्तारीविरुद्ध थियो । सर्वोच्चले सीबीआईको गिरफ्तारीलाई भने वैध ठहर गरेको छ । 

रिहा भइसकेपछि केजरीवालले मुद्दाबारे सार्वजनिकरूपमा टिप्पणी गर्न पाउने छैनन् । यस्तै, मुद्दाको अन्तिम टुंगो नलागेसम्म अदालतमा उपस्थित हुनुपर्ने छ ।

केजरीवाललाई प्रवर्तन निर्देशालय (ईडी)को टोलीले मार्च २०२४ मा पक्राउ गरेको थियो ।

जुलाई १२ मा केजरीवालले सर्वोच्च अदालतबाट जमानत पाएका थिए । तर, जमानत पाएलगत्तै सीबीआईले केजरीवाललाई पक्राउ गरेको थियो । 

केजरीवाल पक्राउ परेको १७७ दिनपछि रिहा हुन लागेका हुन् ।

एनडीटीभीबाट ।