काठमाडौं । 'एप्पल इभेन्ट–२०२४'मा सार्वजनिक गरिएको एप्पल इन्टेलिजेन्सले चर्चा पाएको छ । विश्वभर प्रविधि क्षेत्रका कम्पनीहरूले आर्टिफिसियल इन्टेलिजेन्स (एआई)का क्षेत्रमा नयाँ काम गर्दै आएका बेला एप्पल इन्टेलिजेन्सबाट पनि विशेष अपेक्षा गरिएको थियो ।

नोट लिने र त्यसलाई सारांशमा ढाल्नेजस्ता फिचर सार्वजनिक गरे पनि एप्पलले अन्य एआईहरूको तुलनामा विशेष कुनै फिचर सार्वजनिक गरेन ।

एप्पल इन्टेलिजेन्सले निकै डिमान्डमा रहेका ‘अन्य एआईले पनि गरिरहेका सर्टकट’ कामहरू गर्छ । यी टेक्स्ट एनालिसिस र जेनेरेसनजस्ता काम आइफोनका लागि राम्रै हुने छन् । एप्पलका सीईओ टिम कुकले सोमबार 'ग्लोटाइम इभेन्ट'मा एप्पल इन्टेलिजेन्समा ब्रेक थ्रू क्षमता रहेको र यसले विशेष प्रभाव पार्ने बताएका थिए ।

के छन् क्षमता ?

• प्याराग्राफ तथा पाठको पुनर्लेखन,
• इमेल तथा म्यासेजको सरांश तयार पार्ने,
• फेक इमोजी तथा क्लिप आर्ट बनाउने,
• मान्छे, स्थान तथा इभेन्टको फोटो खोज्न सक्ने,
• क्यामेराबाट देखाएको भरमा खोजी गर्न सक्ने,

एप्पल इन्टेलिजेन्सका यी कुनै पनि क्षमताहरू नयाँ लाग्दैनन् । अहिले लेख्ने तथा सारांश निकाल्ने कयौँ उपकरण उपलब्ध छन् । यस्तै सारांश निकाल्ने काम सबै लार्ज ल्यांग्वेज मोडलले गर्छन् । जेनेरेटिभ आर्ट पनि छ्यापछ्याप्ती उपलब्ध छ । फोटो तथा अन्य खोजी गर्ने फिचर पनि पहिलेदेखि नै उपलब्ध छ ।

यद्यपि, यस्ता सुविधा आइफोनमै उपलब्ध हुनु प्रयोगका लागि सहज पाटो भने हो । तर, यीमध्येका कुनै पनि नयाँ तथा उत्साहपूर्ण छैनन् । गत जुनमै डब्ल्यूडब्ल्यूडीसी इभेन्टमा एप्पले यी विषय सार्वजनिक गरेको थियो र यसमा बग फिक्स गर्नेबाहेक खासै नयाँ अपडेट पनि छैनन्  ।

एप्पलको आइफोन १६ मा यी फिचर समेटिएका हुने छैनन् । पछि नयाँ अपडेटमा उपलब्ध हुने बताइएको छ । यसलाई एप्पलबाट टेक्नोलोजीमा अपेक्षाकृत उपलब्धि नआएको किसिमले टिप्पणी गरिन थालेको छ ।

यस किसिमका ल्यांग्वेज मोडलहरू वैज्ञानिक खोज अनुसन्धान, कोडिङ, मेटेयिर तथा डिजाइन र केही हदसम्म मिडिया क्षेत्रका लागि गेमचेन्जिङ भए पनि अन्य क्षेत्रमा खासै महत्त्वपूर्ण नहुने देखिएको छ । अरू एआई कम्पनीहरूले आफ्ना उत्पादनहरूलाई इन्टरप्राइजेट सास टुलतर्फ विकास गर्न थालेका छन् ।

त्यसैले यस्तो अवस्थामा पुरानै फिचरलाई समेटेको एप्पल इन्टेलिजेन्स र आइफोन १६ लाई कम महत्त्वले हेर्न थालिएको छ ।

टेक क्रन्चबाट ।