काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले नेपाली जनताले देखेको समाजवाद निर्माणको सपना पूरा गर्न सबै समुदायको भूमिका महत्त्वपूर्ण हुने बताएका छन् । शनिबार ललितपुरको खोकनामा मौलिक र ऐतिहासिक पर्व रुद्रायणी देवीको १२ वर्षे मेला समापनका अवसरमा उनले यस्तो बताएका हुन् ।

नेवाःलगायत समुदायको योगदानका कारण संविधानमार्फत सबैको अधिकार निश्चित गरिएको र हाल त्यो कार्यान्वयनको चरणमा रहेको उनले उल्लेख गरे । आफू पहिलोपटक प्रधानमन्त्री भएका बेला ०६५ सालमा नेपाल संवत्लाई राष्ट्रिय संवत्को मान्यता प्रदान गर्ने घोषणा गरेको उनले स्मरण गरे । पछिल्लोपटक नेपाल संवत्लाई हरेक सरकारी कागजातमा उल्लेख गर्ने व्यवस्था मिलाइएको उनले बताए ।

हाल वाग्मती प्रदेशमा नेपालभाषा र तामाङ भाषा सरकारी कामकाजको भाषा हुनु थप ऐतिहासिक काम भएको उनको भनाइ थियो ।

अध्यक्ष प्रचण्डले नेवारी सभ्यताभित्र रहेको साझापन र आत्मनिर्भर अर्थतन्त्रको अभ्यास समाजवादी व्यवस्थासँग मिल्दोजुल्दो भएकाले यसलाई अझै प्रवर्द्धन गर्नुपर्नेमा जोड दिए ।

उनले नेवाः सभ्यताको मौलिकतालाई कायम राख्दै नेवारी संस्कृतिलाई पर्यटन र आर्थिक समृद्धिसँग जोड्नुपर्ने बताए । हिमालयन टेली भ्वाइस