काठमाडौं । आउँदो सोमबार (सेप्टेम्बर ९) मा एप्पल इभेन्ट २०२४ हुँदै छ । कम्पनीले यसपटकको इभेन्टलाई ‘ग्लोटाइम’ भनेको छ । 

इभेन्टमा एप्पल इन्टेलिजेन्स सार्वजनिक हुने अपेक्षा गरिएको छ । यस्तै एप्पलको डिजिटल असिस्टेन्ट सिरीमा पनि जेनेरेटिभ आर्टिफिसियल इन्टेलिजेन्स (एआई)सहितको विशेष अपडेट आउने बताइएको छ ।

आईफोन १६, १६ प्रो र १६ प्रो म्याक्स
इभेन्टमा आईफोन १६ प्रो म्याक्स ठूलो डिस्प्ले र पातलो बेजल्समा सार्वजनिक हुनेछ । यसको स्क्रिन साइज ६.८६ इञ्च रहनेछ । क्यामेराको लेन्स पातलो र हलुका एवं जुम गर्ने क्षमता थप सुधार गरिएको छ । 

आईफोन १६ र १६ प्लसमा क्यामेरा सेटअप डाइगोनल नभई ठाडो रहेको बताइएको छ । यसबाहेक चार्जिङको समस्यालाई केही हदसम्म समाधानस्वरुप ठूलो ब्याट्री र प्रो मोडलमा वाईफाई ७ रहने ठानिएको छ ।

एप्पल वाच सिरिज १०
एप्पल वाचको दशौं सिरिज इभेन्टमा सार्वजनिक हुँदै छ । यो घडी पातलो र ठूलो डिस्प्लेमा सार्वजनिक हुने बताइएको छ । आईफोन १६ मा झैँ यो घडीमा पनि नयाँ प्रोसेसर एस १० समावेश छ । यसले एआई सुविधा समावेश छ । इभेन्टमा प्लास्टिक बडीसहितको सस्तो एप्पल वाच एसई पनि सार्वजनिक हुनेछ । 

एयरपोड्स ४
कम्पनीले एयरपोड्स ४ का दुई संस्करण सार्वजनिक गर्नसक्ने बताइएको छ । सस्तो संस्करणले हाल उपलब्ध एयरपोड्स २ लाई रिप्लेस गर्नेछ । एडभान्स संस्करणले एयरपोड्स ३ लाई विस्थापित गर्नेछ । यसमा एक्टिभ नोइज क्यान्सिलेसन, फाइन्ड माइ फिचर्स र यूएसबी–सी पोर्ट रहनेछ ।

नयाँ म्याक
एप्पलले इभेन्टमा नयाँ एम ४ म्याक्सको घोषणा गर्नसक्ने अपेक्षा गरिएको छ । कोभिड–१९ को महामारीदेखि नै आपूर्ति श्रृंखलाले म्याकको सार्वजनिक मितिलाई असर पारेको छ । यी बाहेक कम्पनीले सार्वजनिक गर्न थप प्रोडक्टहरूको जानकारी सोमबार राति पौने एघार बजे एप्पलको युट्युब च्यानलको लाइभबाट पनि थाहा पाउन सकिनेछ ।