काठमाडौं । अभिनेता धिरज मगरले सरकार–माओवादी द्वन्द्वले प्रेम सम्बन्धमा पार्ने प्रभाव नै चलचित्र ‘खुस्मा’को मुख्य विषय भएको बताएका छन् । बाल्यकालमा आफ्नो प्रेमलाई लिएर गरिने कल्पनालाई चलचित्रले मुख्य विषय बनाएको उनको भनाइ छ । 

“हामी बाल्यकालमा आफ्नो प्रेम यस्तो होस् भनेर जस्तो प्रेमको कल्पना गर्छौं, त्यस्तै पियोर प्रेम कथा भन्ने चलचित्र हो यो,” धिरज भन्छन्,” वास्तवमा नेपालमा चकलेटी फेस हुने नायकलाई टाइपकास्ट गर्ने चलन छ । यसमा म टाइपकास्ट भएको छैन । क्यारेक्टर आर्टिस्टको जस्तै रोल छ ।” आफू दोस्रो सिनेमाबाटै फरक फरक भूमिका र क्यारेक्टरमा काम गर्दै आएको उनले बताए । 

नायिका उपासना सिंह ठकुरी फरक वातावरणमा भएको प्रेम कथामा आफूले ‘खुस्मा’मा काम गरेको बताउँछिन् । चलचित्रमा गाउँको कल्चर र कथा रहेको उनको भनाइ छ । क्यारेक्टरलाई न्याय गर्न आफूले गाउँमै गएर अध्ययन गरेको उनले स्मरण गरिन् । 

“हाम्रो सिनेमाको फर्स्ट ड्राफ्ट अर्कै थियो । तर जब हामी गाउँमै गएर काम गर्यौं । त्यसपछि कथामा परिवर्तन गर्यौं,” उनले भनिन् । 

धिरजले स्थानीय जनजीवन र चरित्र बुझ्न र न्याय गर्न आफूले धेरै डकुमेन्ट्री र पुस्तकको अध्ययन गरेको बताए । 

निर्देशक अशोक थापा मगर चलचित्र द्वन्द्वको कथा नभएको बताउँछन् । उनले द्वन्द्वको पृष्ठभूमीमा मात्रै कथा भनिएको उनले प्रष्ट पारे । 

“हाम्रो चलचित्र सरकार–माओवादी द्वन्द्वको कथा होइन । द्वन्द्वको बाछिटा मात्रै छ,” निर्देशक अशोक भन्छन्, “यो चलचित्र कुनै पक्षतिर नढल्किएर तटस्थ भएर बनेको छ ।” द्वन्द्वमा प्रवेश नै नगरी चलचित्र बनाएको उनको भनाइ छ । 

चलचित्र कसैको व्यक्तिगत वास्तविक कथामा नबनेको यद्यपि केही अशं भने आफन्तबाट लिएको उनले प्रष्ट पारे । “मेरो साथीको आफन्तले भोगेको कुराले मलाई टच गरेको हो । तर त्यो सिनेमाको सानो अंश मात्रै हो,” उनले भने, “बाँकी कथा छुट्टै हो ।” 

चलचित्र असोज ३ गते रिलिज हुँदै छ ।