काठमाडौं । नेपाल प्रज्ञा–प्रतिष्ठानको साहित्य (काव्य/पद्य) विभागले ‘बदलिँदो परिवेशमा तिज र तिजगीतको सान्दर्भिकता’ विषयमा एक अन्तरक्रिया कार्यक्रमको आयोजना गर्‍यो ।

प्रतिष्ठानका कुलपति भूपाल राईले कार्यक्रमको उद्घाटन गर्दै पितृसत्ताबाट उत्पीडनमा परेका महिलाहरू एकआपसमा भेला भएर तिज मनाउँदै आएको बताउँदै यसलाई नारी मुक्तिको विद्रोहसँग पनि जोडेर हेर्नुपर्नेमा उनले जोड दिए । 

सदस्य सचिव डा. धनप्रसाद सुवेदीले महिलाहरूको महान् पर्व तिज नारीबीच एकआपसमा सुखदुःख, अभाव र उत्पीडनलाई व्यक्त गर्ने पर्व भएको बताए । 

साहित्य (काव्य/पद्य) विभागका प्रमुख बाबा बस्नेतले तिज पुरातन संस्कृति र परम्परामा आधारित भए पनि समयसापेक्ष नवीनशैली देखापरेको बताइन् ।

कार्यक्रममा सुधा मैनालीले 'बदलिँदो परिवेशमा तिज र तिज गीतको सान्दर्भिकता’ विषयक कार्यपत्र प्रस्तुत गरेकी थिइन् । 

कार्यक्रममा प्रा.डा. ज्ञानु पाण्डेले विद्यमान विश्वास र परम्पराले गाँजेको तिज पर्वलाई अब महिलाले मौलिक संस्कृतिप्रति सचेत रहँदै विद्रोही स्वर दिनुपर्ने बताइन् । 

सोमप्रसाद गड्तौलाले तिज पर्वलाई राम्रोसँग बुझ्न ‘शिव महापुराण’को अध्ययन गर्नुपर्ने बताए ।