काठमाडौं । राष्ट्रिय प्रजातन्त्र पार्टी (राप्रपा)ले फ्रान्सको पेरिसमा भएको पारालम्पिकमा नेपालका लागि ऐतिहासिक पदक जित्न सफल पारा तेक्वान्दो खेलाडी पलेशागोवर्धनलाई बधाई तथा शुभकामना दिएको छ ।

सोमबार पार्टी अध्यक्ष राजेन्द्र लिङ्देनले एक विज्ञप्तिमार्फत सीमित स्रोत साधनका बाबजुद पलेशाले प्राप्त गरेको कांस्य पदकसहितको सफलताले अत्यन्तै प्रसन्न तुल्याएको बताएका छन् ।

"नेपाली खेलकुद इतिहासमा कुनै पनि ओलम्पिक्समा आधिकारिक पदक जित्ने पहिलो नेपाली खेलाडी बनेकी पलेशाको सफलता अहिलेसम्मकै सबैभन्दा ठूलो सफलता भएको छ । उनले नेपाललाई दिलाएको पदक राष्ट्रिय गौरवको विषय हो," लिङ्देनले भनेका छन् ।

उनले खेलकुद क्षेत्रलाई राज्यले विशेष प्राथमिकता दिनुपर्ने पनि बताएका छन् । खेलकुदमा लगानी वृद्धि गरेर खेलाडीलाई हौसला प्रदान गरी मनोबल उच्च बनाउने काममा सरकारको ध्यान दिनुपर्ने उनको भनाइ छ ।

पलेशाले पेरिसस्थित ग्रान्ड प्यालेसमा गत शुक्रबार राति भएको के–४४ विधाअन्तर्गत महिला ५७ केजी तौल समूहबाट कांस्य जितेकी थिइन् । उनले रिपिचेजको दोस्रो खेलमा सर्बियाकी मरिजा मिचेभलाई १५–८ स्कोरले हराउँदै पदक पक्का गरेकी थिइन् ।