काठमाडौं । नेपाली पारा तेक्वान्दो खेलाडी पलेशा गोवर्धनले पेरिसमा जारी पारालम्पिकमा ऐतिहासिक कांस्य पदक जितेकी छन् । पलेशाले पेरिसस्थित ग्रान्ड प्यालेसमा शुक्रबार राति भएको के–४४ विधाअन्तर्गत महिला ५७ केजी तौल समूहबाट कांस्य जितेकी हुन् । उनले रिपिचेजको दोस्रो खेलमा सर्बियाकी मरिजा मिचेभलाई १५–८ स्कोरले हराउँदै पदक पक्का गरिन् ।

ओलम्पिकको इतिहासमा नेपाली खेलाडीले जितेको यो पहिलो आधिकारिक पदक हो । नेपालले सन् १९६४ को टोकियोदेखि ग्रीष्मकालीन ओलम्पिकमा तथा सन् २००४ एथेन्सबाट पारा ओलम्पिक खेल्न थालेको हो ।

खेलको पहिलो चरणमा भेनेजुयलाकी भलेरिया मोराल्सविरुद्ध ३१–० को स्कोर जित निकाले पनि पलेशा क्वार्टरफाइनलमा शीर्ष वरीयताकी ब्राजिलियन खेलाडी सिल्भाना फर्नान्डेससँग १०–८ ले पराजित हुँदा सेमिफाइनल पुग्न असफल भएकी थिइन् । तर, रिपिचेजमा पहिलो खेलमा फ्रान्सकी चौथो वरीयताकी सोफी कार्भजनलाई २–१ स्कोरले हराएपछि पलेशा कांस्य पदक नजिक पुगेकी थिइन् ।

पलेशा चीनमा भएको एसियाली पारा खेलकुदकी काश्य विजेता समेत हुन् । पलेशा कविराज नेगीको प्रशिक्षणमा छिन् ।