काठमाडौं । राष्ट्रिय जीवनमा महत्त्वपूर्ण भूमिका निर्वाह गरेका चार अग्रणी महिलाको जीवनी सचित्र बालकथाका रूपमा सार्वजनिक भएको छ । 

पर्यटन उद्यमी अम्बिका श्रेष्ठको निधन भएको ४५ दिनकै बखत आइतबार लोकार्पण गरिएका उक्त चार पुस्तकको संग्रहभित्र श्रेष्ठबाहेक न्यायकर्मी सपना प्रधान मल्ल, प्रथम नेपाली महिला सगरमाथा आरोही पासाङ ल्हामु शेर्पा र बौद्ध भिक्षुणी गायिका आनी छोइङ ड्रोल्माका जीवन भोगाइ समेटिएका छन् । लुज माथेमाका शब्दहरूमा उभिएको यो संग्रह पब्लिकेशन नेपालले तयार पारेको हो ।

पुस्तकको विमोचन बत्तीसपुतलीस्थित द्वारिकाज होटेलमा गरिएको थियो । राजा वीरेन्द्रको राज्याभिषेकका बेला संसारभरिबाट आएका पाहुनाहरूका निम्ति होटेल अभाव भइरहेको बखत आफ्नै घरलाई अतिथिगृहका रूपमा थालनी गरिएको पहल नै कालान्तरमा होटेल द्वारिकाजमा परिणत भएको हो । अम्बिकाको मेहनतकै प्रतिफलमा यो होटेल आज पनि विशिष्ट विदेशी पाहुनाहरूको रोजाइमा पर्ने गरेको छ ।

भिक्षुणी गायिका आनी सांगीतिक कर्ममार्फत परोपकारका क्षेत्रमा पनि सक्रिय छिन् । शिक्षा र स्वास्थ्यका क्षेत्रमा उनको उल्लेखनीय योगदान छ । सगरमाथाको शिखर चुम्ने क्षणसम्म पुग्नुअघि दिवंगत आरोही पासाङ ल्हामु शेर्पाले नेपाली समाजमा परम्परादेखि चल्दै आएको विभेदकारी परिस्थितिविरुद्ध निकै संघर्ष गर्नुपरेको थियो । 

कानुनी क्षेत्रमा अग्रता लिइरहेकी सपना प्रधान मल्लले भने विभेदमुक्त समतामूलक समाज स्थापनाका लागि निकै अघिदेखि आफूलाई सक्रिय बनाउँदै आएकी छिन् । 

विमोचन कार्यक्रममा पुस्तक लेखिका माथेमाकी सुपुत्री समाइराले पुस्तक हस्तान्तरण गरेपछि चारैजना पात्र तथा तिनका प्रतिनिधिले पुस्तक सार्वजनिक गरेका थिए । 

दिवंगत अम्बिका र पासाङ ल्हामुका तर्फबाट उनीहरूका सुपुत्रीहरू क्रमशः संगीता एवं दावाको प्रतिनिधित्व थियो । त्यसअघि कार्यक्रम सञ्चालिका सदीक्षा श्रेष्ठले चारैजना पात्र एवं लेखिका माथेमासँग संक्षिप्त वार्तालापसमेत गरेकी थिइन् ।

छोरीहरू सबै मामिलामा सक्षम र पूर्ण रहन्छन् भन्ने ज्ञान नै आफ्नी आमाबाट विरासतका रूपमा पाएको संगीता श्रेष्ठले बताएकी थिइन् । सर्वोच्च अदालतकी न्यायाधीश मल्लले भने केटाकेटीलाई हुर्काउँदाको क्षणदेखि नै अभिभावकले तिनको हक र अधिकारको चेतना प्रदान गर्नुपर्ने औंल्याइन् । 

आनी छोइङ ड्रोल्माले आम केटाकेटीभन्दा आफ्नो बाल्यकाल बेग्लै किसिमको कठोर रहेको जानकारी दिँदै त्यो बेग्लैपनाले नै आफूलाई आजको ठाउँसम्म पुर्‍याएको स्पष्ट पारिन् । अर्की पात्र पासाङ ल्हामुकी सुपुत्री दावाले भने आफ्नी आमाले सफलताअघि पनि चारपटक सगरमाथा चढ्ने प्रयास गरिसकेको जस्ता आधारभूत जानकारी पनि आम रूपमा बाहिर नआएको अवस्थामा यो पुस्तकले स–साना बालबालिकालाई तथ्यसँग नजिक्याउने अपेक्षा प्रकट गरिन् ।  

लन्डन स्कुल अफ इकोनोमिक्सबाट अन्तर्राष्ट्रिय सम्बन्ध तथा लैंगिक विकास अध्ययन गरेकी लेखिका लुज माथेमाले ‘अदम्य महिलाहरू’ शीर्षकमा शृंखलाबद्ध कथात्मक बालजीवनी लेखन थालनी गरेकी हुन् । त्यसैको पहिलो चरणमा चार नेपाली अग्रणी महिलाहरूको यो संग्रह तयार भएको हो ।