काठमाडौं । देशका केही स्थानमा शनिबार अपराह्न र बेलुका वर्षा भएको छ । सिन्धुलीमा भारी वर्षा भएको जल तथा मौसम विज्ञान विभागले जानकारी गराएको छ ।

मरिनखोला कुसुमटार वर्षामापन केन्द्र र आसपास क्षेत्रमा भारी वर्षा भएको विभागले जनाएको छ । खोलाहरूमा जलसतह केही बढ्न सक्ने रहेकाले सतर्कता अपनाउन विभागले सचेत गराएको छ ।

“भाद्र १५, साँझ ५  बजे । पछिल्लो एक घण्टामा सिन्धुली जिल्लाको मरिन खोला कुसुमटार वर्षामापन केन्द्र र आसपासको क्षेत्रमा भारी वर्षा भएको र थप वर्षा हुन सक्ने सम्भावना रहेकोले सो जिल्ला भई बहने मरिन खोला, झोर खोलालगायत स–साना खोलाहरूमा जलसतह केही बढ्न सक्ने रहेकाले सतर्कता अपनाऔँ,” विभागको सूचनामा उल्लेख छ ।

यस्तै, दोलखामा मध्यम वर्षा भएको छ । थप वर्षा हुन सक्ने सम्भावना छ । “भाद्र १५, साँझ ५ः१० बजे । पछिल्लो एक घण्टामा दोलखा जिल्लाको सिंगाटी वर्षामापन केन्द्र र आसपासको क्षेत्रमा मध्यम वर्षा भएको र थप वर्षा हुन सक्ने सम्भावना रहेकोले सो जिल्ला भई बहने तामाकोसी नदी र यसका सहायक नदीहरूमा तथा खरेखोलालगायत स–साना खोलाहरूमा जलसतह केही बढ्न सक्ने रहेकाले सतर्कता अपनाऔँ,” विभागले सचेत गराएको छ ।

मकवानपुरका केही स्थानमा पनि वर्षा भएको छ । त्यहाँ सामान्यदेखि मध्यम वर्षा भएको विभागले जनाएको छ ।

“भाद्र १५, साँझ ४ः१० बजे । पछिल्लो तीन घण्टामा मकवानपुर जिल्लाको मकवानपुर गढी, हेटौँडा, रजैया वर्षामापन केन्द्र र आसपासको क्षेत्रमा सामान्यदेखि मध्यम वर्षा भएको र थप वर्षा हुन सक्ने सम्भावना रहेकोले सो जिल्ला भई बहने पूर्वी राप्ती नदी र यसका सहायक नदीहरूमा तथा सम्रीखोलालगायत स–साना खोलाहरूमा जलसतह केही बढ्न सक्ने रहेकाले सतर्कता अपनाऔँ,” विभागले भनेको छ ।