काठमाडौं । नेपाली कांग्रेसका सांसद राजेन्द्र बजगाईंले गौरा पर्वका अवसरमा काठमाडौंको टुँडिखेलमा आयोजित कार्यक्रममा युवाले व्यक्त गरेको आक्रोश आफ्नो पार्टीमाथिको आक्रमण हो ? भन्दै प्रश्न गरेका छन् । बिहीबार प्रतिनिधिसभा बैठकको आकस्मिक समयमा उनले उक्त कार्यक्रममा युवाको आक्रोश कोप्रति लक्षित हो ? भन्दै प्रश्न गरेका हुन् ।

प्रतिपक्ष दलका सांसदहरूले पक्राउ परेका युवाको रिहाइको माग गरेका उनले उल्लेख गरे । उनले त्यहाँ पार्टीका कार्यकताको पनि उपस्थिति रहेको जिकिर गरे ।

गौरा पर्वमाथि आक्रमण गरिएको कि प्रधानमन्त्री र पूर्वप्रधानमन्त्रीमाथि ? भन्दै उनले प्रश्न गरे । उनले त्यहाँ धार्मिक सहिष्णुता भंग गर्ने गतिविधि भएको आरोप लगाए ।

राष्ट्रिय स्वतन्त्र पार्टी (रास्वपा)का सहमहामन्त्री आफूकहाँ क्यानका महानिर्देशकलाई हटाउनु हुँदैन भन्न आएको उनले संसद्लाई जानकारी गराए ।

प्रतिनिधिसभा बैठकमा सांसद राजेन्द्र बजगाईंको भनाइ पढ्नोस्–
टुँडिखेलमा गौरा पर्वमा जुन किसिमको घुसपैठ, आक्रमण भयो, त्यो आक्रोश पनि भन्न सकिन्छ । तर, घुसपैठ भयो भनेर प्रतिपक्षको रोमा बसेका सांसद साथीहरूले त्यहाँ जुन हर्कत गर्नुभएको थियो, त्यहाँ प्रदर्शन गर्नुहुने साथीहरूको रिहाइको माग गर्नुभयो । दलका साथीहरूको पनि त्यहाँ उपस्थिति देखियो भनेर पत्रपत्रिकामा आएको छ । गौरा पर्वमा आक्रमण गरेको कि नेपालको सरकार, नेपालको प्रधानमन्त्री, नेपालको सरकारको साझेदार पूर्वप्रधानमन्त्रीमाथि आक्रमण गरेको ? अथवा, नेपाली कांग्रेसमाथि आक्रमण गरेको ? म यो धार्मिक सहिष्णुता भंग गर्ने गतिविधिका लागि जुन दल उद्यत छ, त्यो दलमाथि प्रश्न गर्न चाहन्छु । रास्वपाका सहमहामन्त्री मकहाँ हतारिँदै आउनुभयो, क्यानका डीजीका बारेमा– उहाँ हाम्रो मान्छे, रवि लामिछानेको निर्वाचन क्षेत्रको मान्छे, उहाँलाई जोगाउनुपर्‍यो भनेर मकहाँ अचानक आउनुभयो । त्यो पार्टीको सहमहामन्त्री हुनुहुन्थ्यो । म प्रश्न गर्न चाहन्छु– यो द्वैध चरित्रले यो देश कहाँ पुग्छ ? नयाँ पार्टीसँग जनताको आशा, भरोसा छ भनिएको छ । यस्तो डबल स्ट्यान्डर्ड हाम्रो देशमा नयाँ पार्टीबाट हुन्छ भन्ने मैले कहिल्यै कल्पना गरेको थिइनँ । यस विषयमा आमनेपाली जनता र सदनको ध्यानाकृष्ट गराउन चाहन्छु । न्युज एजेन्सी नेपाल