विराटनगर । कोसी प्रदेशको राजधानी विराटनगरमा ऐतिहासिक राधाकृष्ण रथयात्रा निकालिएको छ । मंगलबार धुमधामसँग सांस्कृतिक र धार्मिक र्‍यालीसहित रथयात्रा निकालिएको हो । विराटनगरमा ५५ वर्षअघि पहिलोपटक रथयात्रा निकालिएको थियो । 

तीनपैनीस्थित राधाकृष्ण मन्दिर परिसरबाट निस्किएको रथयात्रा विराटनगर बजार परिक्रमा गराई पुनः मन्दिर परिसर आउने छ । श्रीकृष्ण जन्माष्टमीको भोलिपल्ट रथयात्रा निकाल्ने प्रचलन छ । कोसी सरकारले रथयात्राको सन्दर्भ पारेर मंगलबार (आज) सार्वजनिक बिदा दिएको छ । 

यो रथयात्रा दक्षिण एसियाकै दोस्रो ठूलो मानिन्छ । वि.सं १९८८ सालमा पहिलोपटक खटमा राखेर राधाकृष्णलाई परिक्रमा गराइएको थियो । २०२५ बाट भने रथमा विराजमान गराई नगर परिक्रमा गराउने चलन बसेको हो । 

मुख्यमन्त्री हिक्मत कार्कीले रथयात्रा शुभारम्भ गरेका थिए । यसमा सहभागी हुन भारतदेखि कोसी प्रदेशका विभिन्न जिल्लाबाट भक्तजन विराटनगर आएका छन् । 

पाँच लाख भक्तजन सहभागी हुने मूल आयोजक समितिका सचिव कृष्ण कार्कीले दाबी गरे । नगरक्षेत्रका विभिन्न ४२ स्थानमा विश्राम गराई सर्वसाधारणले पूजाअर्चन गर्ने व्यवस्था मिलाइएको उनले बताए ।

महानगर क्षेत्रमा जन्माष्टमी केन्द्रित सुरक्षालाई थप मजबुत बनाइएको र सोही परिमाणमा प्रहरी परिचालन गरिएको जिल्ला प्रहरी कार्यालय मोरङले जनाएको छ ।