काठमाडौं । प्रधानमन्त्री केपी शर्मा ओलीले मुुलुकको विकासमा युवाको भूमिकालाई सरकारले महत्त्वका साथ हेरेको बताएका छन् । शनिबार काठमाडौंमा आयोजित काठमाडौं युथ कन्क्लेभ २०२४ मा सोधिएको प्रश्नको जवाफ दिँदै उनले युवा नै देशको सम्पूर्ण शक्ति भएको बताए ।

युवालाई अघि बढाउन राम्रो शिक्षा र अवसर प्रदान गर्नुपर्ने उनले उल्लेख गरे । सरकारले युवालाई रोजगारीमा जोड्न स्टाटपको कार्यक्रम सुरु गरेको उनले जानकारी गराए ।

आफूहरू धेरै दुःख गरेर राजनीतिमा आएको भन्दै उनले हाल त्यस्तो अवस्था नरहेको बताए ।

समाजमा आत्मकेन्द्रित र स्वार्थी प्रवृत्ति बढेको उनको बुझाइ छ । यसबाट जघन्य आपराधिक घटना बढ्दै गएका कारण सामाजिक मूल्य–मान्यतामा गम्भीर हुनुपर्नेमा उनले जोड दिए ।

प्रधानमन्त्री ओलीले वर्तमान सरकारसँग आस र भर गर्न आग्रह गर्दै देशमा केही परिवर्तन ल्याएरै छाड्ने भनेर आफू लागेको बताए ।

उनले आफ्नै अगुवाइमा देशमा पहिलो महिला राष्ट्रपति, प्रधानन्यायाधीश, सभामुख, रक्षामन्त्री र मुख्यसचिव बनाइएको सुनाए । महिला प्रधानमन्त्री पनि बनाउने इच्छा भएको उनले बताए ।

हरेक ‘डेलिगेसन’मा एक महिला अनिवार्य सहभागी गराउनुपर्ने नियम आफूले बनाएको उनको भनाइ थियो ।