काठमाडौं । नेपाली कांग्रेसका नेता कृष्णप्रसाद सिटौलाले संविधान संशोधनमा प्रवेश गर्नुअघि कार्यान्वयनको समीक्षा गर्न प्रस्ताव गरेका छन् । नेपाली कांगेसको गत साउन २३ देखि जारी केन्द्रीय समिति बैठकमा शुक्रबार नेता सिटौलाले कार्यान्वयनको समीक्षाबिनै संशोधनमा प्रवेश गरे त्यसले दुर्घटनामा पुर्‍याउने चेतावनी दिए ।

“कांग्रेस र एमालेबीचको सात बुँदे सहमतिमा रहेको संविधान संशोधनको बुँदाले धेरैलाई तरंगित बनाएको छ,” सिटौलाले भने, “त्यस्तो तरंग पार्टीभित्र पनि छ र पार्टीबाहिर पनि छ । देशभित्र स्वभाविक चासो छँदैछ । देश बाहिर पनि छ ।”

उनले यो तरंगले सकारात्मक संकेत नगरेको भन्दै त्यही कारण सचेत हुन जरुरी रहेको बताए । संविधानमा नभएर कार्यान्वयनमा रहेका समस्यालाई पहिला हल गर्नुपर्ने उनको तर्क थियो । “संविधान संशोेधनमा पस्नुभन्दा पहिले संविधान कार्यान्वयनको समीक्षा गर्नुपर्‍यो । संविधानको कार्यान्वयनमा संघीय, प्रदेश, स्थानीय सरकारबाट केही त्रुटि भएका होलान् तीनलाई सच्याउनुपर्‍यो,” उनले भने, “गल्ती कसरी करेक्सन गर्ने र जनतामा डेलिभरी दिनसकिन्छ भनेर पनि काम गर्नुपर्‍यो ।”

उनले त्यति काम सकेपछि मात्र संशोधनको मुद्दामा प्रवेश गर्न सकिने बताए । “समीक्षा र करेक्सनपछि मात्र हामी संशोधनमा प्रवेश गर्न सक्छौँ । प्रदेशको अधिकार र स्थानीय तहको अधिकार हामीले दिएकै छैनौँ,” सिटौलाले भने, “हाम्रो न्यायपालिका, हाम्रा संवैधानिक निकायहरू, हाम्रो संघीय व्यवस्थापिका, प्रदेशसभा सबैको समीक्षा पहिले गरौँ । त्यसपछि संविधान संशोधनमा प्रवेश गरौँला ।”