काठमाडौं । सरकारले डिजिटल नेपालको नारा लगाउने तर, सेवा प्रदायकलाई भ्याट छुटको दायराबाट हटाउने कार्य गर्दा डिजिटल ट्रान्जेक्सन महंगो परेको भन्दै संसद्मा कुरा उठेको छ । बिहीबार प्रतिनिधिसभा बैठकमा नेपाली कांग्रेसकी सांसद प्रतिमा गौतमले सो कुरा उठाएकी हुन् । 

सरकारले भ्याट छुट हटाएपछि अधिकांश सेवा प्रदायकले अतिरिक्त शुल्क लगाएको भन्दै गौतमले पुनः मूल्यांकन गर्न माग गरेकी हुन् । नेपाल क्यिरिङ हाउसले प्रत्येक लेनदेनमा आठ रुपैयाँसम्म शुल्क र १३ प्रतिशत भ्याट लगाएका कारण डिजिटल ट्रान्जेक्सन महंगो परेको गौतमको भनाइ छ । 

डिजिटल भुक्तानी प्रर्वद्धन गर्न १० प्रतिशत भ्याट छुट गर्ने नीति प्रभावकारी बनाएर डिजिटल नेपाल फ्रेमवर्कसँग मेल खाने नीति बनाउन उनले सरकारसँग माग गरिन् ।