काठमाडौं । भारतमा शक्तिशाली मानिने योगी कालीबाबा पाँचदिने नेपाल भ्रमण पूरा गरेर आज फर्किएका छन् । नेपाली मूलका कालीबाबाले फर्किनुअघि नेपाल चाँडै हिन्दु राष्ट्र हुँदै गरेको बताएका छन् । 

गत साउन ३१ मा नेपाल आएका काली बाबाले विभिन्न शक्तिपीठको भ्रमण गर्नुका साथै नेता र सामाजिक अभियन्तासँग भेट गरेका थिए । दोलखाको भीमेश्वर, झापाको कन्काई, इलामकोे नेप्टे र चेप्टे संगम, पशुपति नाथ, डोलेश्वर महादेव र कुमारी दर्शनसहित विशेगा पूजा गरेका कालीबाबाले नेताहरू र नागरिक दुवैमा हिन्दु राष्ट्र छोडेकोमा पश्चाताप व्यक्त गरेको बताए । “नेपाली जनतामा हिन्दु राष्ट्र छोडेकोमा नेताहरूप्रति आक्रोश पाएको छु । मसँग भेट भएका नेताहरूले विगतमा गल्ती भएको भनेर पश्चाताप गर्नुभएको छ,” कालीबाबाले पत्रकार सम्मेलनमा भने, “मेरो ब्रह्मले भन्छ– नेपाल चाँडै हिन्दु राष्ट्र बन्दै छ ।” 

उनले अहिलेको मनोविज्ञानले हिन्दु राष्ट्रका लागि ०८५ साल कुर्नु नपर्ने बताएका छन् । आफू नागरिकका रूपमा नेपाली र योगीका रूपमा विश्वभरका हिन्दुको प्रतिनिधि भएको भन्दै विश्वका हिन्दुहरूको मुकुटका रूपमा रहेको नेपाललाई हिन्दु राष्ट्र नै कायम गरिनुपर्ने बताए ।

“हाम्रो राष्ट्र देव पशुपतिनाथ विश्वभरकै हिन्दुका आरध्यदेव हुनुहुन्छ, हिन्दुराष्ट्र बनाएपछि हिन्दु पर्यटकहरूबाटै नेपाललाई रोजगारी सिर्जनासहित समृद्धि हासिल गर्न पर्याप्त हुन्छ,” उनले भने, “यो राष्ट्र नागरिकको आस्थाका आधारमा हिन्दु थियो, छ र रहिरहने छ । नेताहरूले गरेको गल्ती अब सच्याउँदै छन् ।” 

उनले आफू राजासहितको हिन्दु राष्ट्रका पक्षमा रहेको भन्दै नागरिकको छनोट सर्वोपरि हुने बताए । हिन्दु राष्ट्र कि राजा भन्ने प्रश्नमा उनले भने, “राजा नागरिकको चाहनाअनुसार आउने हो । म एउटा योगीको हिसाबले  भन्छु– हिन्दु राष्ट्र ।” 

उनले कोटीहोमका आयोजकप्रतिको धरपकडको पनि विरोध गरे । कसैमाथि अभियोग छन् भने नियमानुसार पक्राउ पुर्जी दिएर पक्राउ गर्ने र अनुसन्धान गर्ने अधिकार राज्यलाई रहेको भन्दै कोटिहोमस्थलमा गएर धरपकटलाई स्वभाविक मान्न नसकिने उनको भनाइ थियो । “कोही क्रिमिनल छ भने उसलाई नियमअनुसार पक्राउको कागज दिएर राज्यले पक्राउ गर्न र अनुसन्धान गर्नसक्छ,” कालीबाबाले भने, “त्यो काम कोटीहोम महायज्ञ सुरु हुनुअघि पनि हुनसक्थ्यो र कोटीहोम समापनपछि घरमै पुगेर पनि गर्न सक्थ्यो ।” 

महायज्ञको मण्डपमा पुगेर धरपकड गर्नुले प्रहरी प्रशासन र सरकार हिन्दुहरूलाई हतोत्साही बनाउन चाहन्छ भन्ने सन्देश गएको उनको भनाइ थियो ।