काठमाडौं । २०७७ चैत २१ गते । घडीको सुईले रातिको साढे ९ बजेको जनाउ दिइसकेको थियो । अप्सरा भनिने जमुना बस्ताकोटी ललितपुरको लगनखेलस्थित घरमा एक्लै थिइन् । श्रीमान् हिक्मत श्रेष्ठ घर बाहिर थिए । प्रेम विवाह गरेका हिक्मत र अप्सराबीच विवाहको केही समयदेखि नै सम्बन्ध समधुर हुन सकेको थिएन ।

हिक्मतको बेलुका घर फर्किने खासै ठेगान नै हुँदैनथियो । चैत २१ गते त्यसैको निरन्तरता थियो । अप्सराको माइतीपक्षको आरोपअनुसार हिक्मतले बिहेको एक वर्षदेखि नै दाइजोको नाममा पटक–पटक विवाद गर्दैै आएका थिए ।

अप्सराले श्रीमान्‌को दबाब झेलिरहे पनि घर छोड्न चाहिनन् । बरु बेलुका घर फर्किने ठेगानै नभएका श्रीमान्का लागि खाना पकाएर राखेकी हुन्थिन् ।

चैत २१ को बेलुका पनि श्रीमान् हिक्मतका लागि भनेर खाना बनाएकी थिइन् । तर, हिक्मतले त्यो राति खाना चिसो भएको भन्दै अप्सरासँग निहुँ खोजे । त्यसै निहुँमा विवाद भयो । विवादले उग्र रूपमात्रै लिएन, हिक्मतले भान्सा कोठामा भएको मट्टितेल अप्सराको शरीरभरी खन्याएर आगो नै लगाइदिए ।

मट्टितेल छर्केर आगो लागेका अप्सरा गम्भीर घाइते भइन् । हिक्मत आफैँले अप्सरालाई उपचारका लागि पाटन अस्पतालसमेत पुर्‍याए । तर, पाटन अस्पतालले भने उपचार सम्भव नहुने भन्दै कीर्तिपुरस्थित वर्न अस्पताल रिफर गर्‍यो ।

घटनाबारे माइतीपक्ष कसैलाई जानकारी थिएन । एक कान दुई कान हुँदै अप्सराकी बुवा भक्तबहादुर बस्ताकोटीले थाहा पाए । उनी आत्तिदै घटनाको १० दिनपछि चैत ३१ गते पाटन अस्पताल पुगे । पाटन अस्पतालले कीर्तिपुर वर्न अस्पताल रिफर गरेको जानकारी गराए । भक्तबहादुर कीर्तिपुर अस्पताल हानिए । तर, उनले छोरी अप्सरालाई जीवित भेट्न पाएनन् । अस्पतालले अप्सराको त्यहीदिन बिहान ११ बजे मृत्यु भइसकेको जानकारी भक्तबहादुरलाई गराए ।

हिक्मतले श्रीमती अप्सरा आफैँले मट्टितेल खन्याएर आत्महत्याको प्रयास गरेको जानकारी प्रहरीदेखि अस्पताललाई गराएका थिए । तर, छोरीको आत्महत्या नभई ज्वाइँ हिक्मतले हत्या गरेको भन्दै भक्तबहादुरले  किटानी जाहेरी दिए । भक्तबहादुरको जाहेरी प्रहरीले पनि लियो । तर, अनुसन्धान नै अगाडि बढेन ।

चार वर्षपछि पक्राउ
श्रीमतीको हत्यापछि पनि हिक्मत पक्राउ परेनन् । प्रहरीले त्यतिबेला अप्सराको आत्महत्यालाई नै स्थापित गर्न खोजे । प्रहरीले त्यहीअनुसारकै अनुसन्धान प्रतिवेदन जिल्ला सरकारी वकिल कार्यालय पठायो । तर, अप्सराको बुवा भक्तबहादुर निरन्तर छोरीको न्यायका लागि धाइरहे ।  

केही दिनअघि जिल्ला सरकारी वकिल कार्यालय ललितपुरले पनि अप्सराको आत्महत्या नभई कर्तव्य ज्यान मुद्दामा अनुसन्धान गर्न प्रहरीलाई पुनः पत्राचार मात्रै गरेन्, पक्राउ पुर्जीसहित प्रहरीको पुरानो अनुसन्धान प्रतिवेदन फिर्ता नै गरिदियो ।

वकिल कार्यालयको पत्राचारपछि भने प्रहरीको उपत्यका अपराध अनुसन्धान कार्यालय ललितपुरको टोलीले हिक्मतलाई गएको शुक्रबार पक्राउ गरेको छ ।

जग्गाको कारोबार गर्दै आएका हिक्मतलाई प्रहरीको टोलीले ललितपुरको सातदोबाटोबाट पक्राउ गरेको कार्यालयका एसपी अंगुर जीसीले जानकारी दिए । हिक्मतविरुद्ध आइतबार ललितपुर प्रहरीले थुनामा राखी अनुसन्धान सुरु गरेको छ ।