काठमाडौं । इटालियन सिरी ‘ए’ नयाँ सिजनको पहिलो खेलमा लाजियोले भेनेजियाविरुद्ध ३–१ को जित निकालेको छ ।

आइतबार राति स्टाडियो ओलम्पिकोमा लाजियोलाई जित दिलाउन भ्यालेन्टिन क्यासललानोस र माटिया जाकाग्नीले गोल गरे । लाजियोले अर्को एक गोल भेनेजियाका जर्जियो अल्टारीबाट आत्मघाती रूपमा पाएको थियो । भेनेजियाका म्याड्स एन्डरसनले गोल गरे ।

तेस्रो मिनेटमा एन्डरसनले गोल गरेपछि भेनेजियाले अग्रता बनाएको थियो । तर, ११औँ मिनेटमा क्यासललानोसको गोलबाट लाजियो खेलमा फर्कियो । ४४औँ मिनेटमा जाकाग्नीले गोल गर्दा लाजियोले पहिलो हाफमा २–१ को अग्रता बनाएको थियो । ८१औँ मिनेटमा अल्टारीबाट आत्मघाती गोल भएपछि लाजियोले ३–१ को जित निश्चित गरेको हो ।

जितसँगै तीन अंक जोडेको लाजियो तालिकाको दोस्रो स्थानमा छ । पहिलो खेलमै हार व्यहोरेको भेनेजिया १९औँ स्थानमा छ ।

आइतबार नै भएको सिरी ‘ए’को अर्को खेलमा रोमा र काग्लियरीले गोलरहित बराबर खेल्दै अंक बाँडे । पहिलो खेलमै रोकिएको रोमा एक अंकसहित १४औँ स्थानमा छ । एक अंककै काग्लियरी ११औँ स्थानमा छ ।