रुपन्देही । नेपाल कम्युनिस्ट पार्टी (एमाले) लुम्बिनी प्रदेश संसदीय दलको नेतामा मुख्यमन्त्री चेतनारायण आचार्य चयन भएका छन् । एमाले लुम्बिनी प्रदेश संसदीय दलको शनिबार बसेको बैठकबाट यसअघि नै मुख्यमन्त्री बनेका आचार्यलाई संसदीय दलको नेता चयन गरिएको हो ।

संसदीय दलका नेता रहेका पूर्वमुख्यमन्त्री लीला गिरीले राजीनामा दिएपछि उक्त पद रिक्त थियो । दलको नेता पदमा मुख्यमन्त्री आचार्यलाई चयन गरिएको हो । दलका उपनेता आचार्यलाई मुख्यमन्त्री बनाउने पार्टीको निर्णयप्रति असन्तुष्ट गिरीले गएको साउन ७ गते संसदीय दलको नेताबाट राजीनामा दिएका थिए ।

बैठकबाट उपनेतामा रुपन्देहीका भोजप्रसाद श्रेष्ठलाई चयन गरिएको छ । श्रेष्ठ एमाले लुम्बिनी प्रदेश कमिटी उपाध्यक्ष छन् ।

यस्तै, दलको प्रमुख सचेतकमा रुपन्देहीका तुल्सीप्रसाद चौधरी र सचेतकमा रोल्पाकी यमुना रोका तामाङलाई चयन गरिएको छ । चौधरी यसअघि पनि प्रमुख सचेतक नै थिए ।

नेता गिरी पूर्वनिर्धारित कार्यक्रमानुसार रुपन्देहीबाहिर भएकाले बैठकमा सहभागी नभएको उनको सचिवालयले जनाएको छ । दलको बैठकमा एमाले प्रदेश कमिटी इन्चार्ज एवं पार्टी सचिव पद्मा अर्याल पनि सहभागी थिइन् ।

लुम्बिनी प्रदेशसभामा एमालेका २९ र नेपाली कांग्रेसका २७ गरी ५६ जनाको समर्थनमा साउन ७ गते मुख्यमन्त्री नियुक्त भएका आचार्यले भदौ ४ मा विश्वासको मत लिने भएका छन् । विश्वासको मत प्रयोजनका निम्ति प्रदेशसभाको बैठक आह्वान भइसकेको छ । रासस