काठमाडौं । एभरेस्ट महिला भलिबल लिगका फ्रेन्चाइज टोलीको नेपाली खेलाडी सार्वजनिक भएको छ ।

शुक्रबार आयोजक इन्फिनिटी ड्रिम्स प्रालिले ६ फ्रेन्चाइज टोलीका मुख्य प्रशिक्षकहरूको बैठकले आपसी समझदारीमा ड्राफबाट खेलाडी छानेको जनाएको हो ।

जसअनुसार प्रत्येक टोलीमा ग्रेड ‘ए’ का एक, ‘बी’ का चार र ‘सी’ का तीन खेलाडी छन् । यसैगरी प्रत्येक टोलीले तीन विदेशी तथा ट्यान्ड हन्टबाट एक खेलाडी समावेश गर्ने आयोजकले जनाएको छ ।

प्रतियोगितामा ६ टोलीका ६ मार्की खेलाडी भने यसअघि नै सार्वजनिक भइसकेका थिए । सरस्वती चौधरी गण्डकी, उषा भण्डारी काठमाडौं, निरुता ठगुन्ना मधेस, अरुणा शाही चितवन, सुमित्रा रेग्मी कर्णाली र सलिना श्रेष्ठ ललितपुरको मार्की खेलाडीमा रूपमा छन् ।

यसैगरी ६ टिमका ६ प्रशिक्षकहरूमा महिला राष्ट्रिय टोलीका प्रशिक्षक जगदीश भट्टले काठमाडौं, कुमार राईले कर्णाली, भरत यादवले मधेस, उत्सव खड्काले ललितपुर, अर्जुन घिमिरेले चितवन र रुपेशकुमार विष्टले गण्डकीको जिम्मेवारी सम्हाल्ने छन् ।