काठमाडौं । नेसनल लाइफ इन्स्योरेन्स कम्पनीले ‘शेपिङ द फ्युचर’ भन्ने नाराका साथ चारदिने ‘ब्रान्च मेनेजर्स एनुअल कन्फरेन्स’ चितवन स्थित होटेल सोल्टी वेस्टेन्डमा सम्पन्न गरेको छ । 

कम्पनीका अध्यक्ष प्रेमाराज्य लक्ष्मी सिंहको सभापतित्वमा सो सम्मेलन आयोजना गरिएको थियो । अध्यक्ष सिंहले आर्थिक वर्ष ०८०/८१ मा कम्पनीले प्रथम बिमा शुल्कसहित समग्र सूचांकमा उत्कृष्टता हासिल गर्न सफल भएको बताइन् । कम्पनीका बिमित अभिकर्ता व्यवस्थापन र कर्मचारीहरूको अथक मेहनत, परिश्रम र लगनशिलताको कारणले नै सम्भव भएको सिंहले बताइन् ।

उनले आर्थिक वर्ष ०८०/८१ मा उत्कृष्ट व्यवसाय गर्दै तोकिएको लक्ष्य पूरा गर्ने शाखाहरूलगायत सबैभन्दा बढी प्रिमियम संकलन गर्ने शाखा र उत्कृष्ट पाँच शाखालाई सम्मान तथा पुरस्कार प्रदान गरिन् ।

सम्मेलनमा प्रमुख कार्यकारी अधिकृत सुरेशप्रसाद खत्रीले कम्पनीको व्यवसाय वृद्धि गर्नुपर्ने दायित्व र चुनौतीलाई आत्मसाथ गर्दै आपसी समन्वय गरी अगाडि बढेको कारणले नै कम्पनीको उच्च बोनसदरलाई यथावत् राख्न सकिएको बताए ।

साथै, आगामी आर्थिक वर्षमा पनि यो सफलतालाई निरन्तरता दिनुपर्ने चुनौती थपिएकोले त्यो पूरा गर्न यस सम्मेलन लाभदायक रहने विश्वास व्यक्त गरे ।