काठमाडौं । नेपाल एसोसिएसन फर सफ्टवेयर एन्ड आईटी सर्भिसेस कम्पनीज (नास आईटी)ले ‘नास आईटी अवार्ड्स २०२४’ को आयोजना गर्ने भएको छ । नेपालको सूचना प्रविधि क्षेत्रका इन्नोभेसन, स्टार्टअप, प्रडक्ट र परियोजनालाई प्रवर्धन तथा प्रोत्साहन गर्न अवार्ड्स आयोजना गरेको नास आईटीले बताएको छ ।
काठमाडौंमा मंगलबार एक कार्यक्रमको आयोजना गर्दै अवार्ड घोषणा गरिएको हो । विभिन्न विधामा दिने अवार्ड्समा छनोट हुनेले आफ्नो कम्पनी, संस्था तथा आइडियालाई वैश्विक रूपमा विस्तार गर्ने अवसर पाउने नास आईटीले बताएको छ ।
नास आईटीका अध्यक्ष रिचन श्रेष्ठले अवार्ड्समार्फत नेपाली स्टार्टअप तथा इन्नोभेसनलाई आफ्नो क्षमता प्रदर्शन गर्न अन्तर्राष्ट्रिय अवसर प्राप्त हुने बताए । नास आईटीका उपाध्यक्ष सन्तोष कोइरालाले नेपाली आईटी उद्योगलाई विश्वमञ्चमा लैजान यो महत्त्वपूर्ण अवसर भएको बताए ।
बैंकिङ, बिमा, वित्त, मार्केटप्लेस, शिक्षा, यातायात लजिष्टिक, फिनटेक, आईसीटी सेवा सोलुसन, सेक्युरिटी सोलुसन, प्रोफेसनल सेवा सोलुसन, हेल्थ एन्ड वेल बिड, सरकार, नागरिक सेवा, डिजिटल सरकार तथा स्नातक तहका विद्यार्थीका परियोजना, स्टार्टअप र इन्नोभेसनले अवार्डका लागि आवेदन दिन सक्नेछन् ।
नास आईटी अवार्डका लागि आगामी भदौ ३ गतेसम्म https://awards.nasit.org.np मा गएर अनलाइन आवेदन दिन सकिने छ । अवार्ड विजेतालाई यसै वर्ष सन् २०२४ को डिसेम्बरमा ब्रुनाईमा आयोजना हुने एसिया प्यासिफिक आईसीटी अलायन्स (एपिक्टा) अवार्डमा नेपालको प्रतिनिधित्व गर्ने अवसर मिल्नेछ ।
एपिक्टा अवार्ड्सले विगत २३ वर्षदेखि एसिया प्यासिफिक क्षेत्रमा आईसीटी प्रडक्ट तथा इन्नोभेसन प्रदर्शन गर्ने महत्त्वपूर्ण प्लेटफर्म प्रदान गर्दै आएको नास आईटीले जनाएको छ ।
यस वर्ष एपिक्टा अवार्डमा नेपालसहित अस्ट्रेलिया, बंगलादेश, ब्रुनेई, चीन, चिनियाँ ताइपेइ हङकङ, इन्डोनेसिया, जापान, मकाओ, मलेसिया, म्यानमार, पाकिस्तान, सियापुर, श्रीलंका, थाइल्यान्ड र भियतनाम गरी १७ देशबीच प्रतिस्पर्धा हुनेछ ।
नास आईटीले नेपाललाई ग्लोबल टेक हबको रूपमा विकास गर्ने लक्ष्यअनुसार नेपाली सफ्टवेयर र आईटी उद्योगको वृद्धि र विकासमा काम गर्दै आएको बताएको छ । नवप्रवर्तन, सशक्तिकरण, सहकार्य, क्षमता अभिवृद्धि र नीतिका लागि काम गरिरहेको नास आईटीले बताएको छ । नास आईटी सदस्य प्राथना साखले एपिक्टा अवार्डमा २४ विधामा प्रतिस्पर्धा हुने भए पनि अहिले नेपालमा ११ विधामा खुलाइएको बताइन् ।
-1716278128.jpg)
-1734691541.jpg)
-1734839313.jpg)
