काठमाडौं । फ्रान्सको पेरिसमा सम्पन्न जुलाई २६ देखि सुरु भएको ओलम्पिक आइतबार समाप्त भइसकेको छ । ओलम्पिकमा नेपालबाट सात खेलाडीले सहभागिता जनाए पनि राम्रो प्रदर्शन रहन सकेन ।

नेपालबाट टेबलटेनिसका श्यान्टु श्रेष्ठ, सुटिङकी सुस्मिता नेपाली, पौडीबाट एलेक्जेन्डर शाह र डुवाना लामा, ब्याटमिन्टनका प्रिन्स दाहाल, जुडोकी मनीता श्रेष्ठ र एथलेटिक्सकी सन्तोषी श्रेष्ठले सहभागिता जनाएका थिए ।

समग्रमा यस्तो रह्यो नेपालको पेरिस ओलम्पिक यात्रा

१. टेबलटेनिसको पुरुष सिंगल्समा श्यान्टु श्रेष्ठ सेनेगलका इब्राहिम दिआवसंग प्रिलिमिनरी राउन्डमा १४–१२, ११–३, ११–४, ११–५ को सोझो सेटमा पराजित ।

२. सुटिङको महिला १० मिटर एयर राइफलमा सुस्मिता नेपाली सहभागी ४४ खेलाडीमध्ये कुल ६५४ मा ६०७.८ स्कोरसहित ४२औँ स्थानमा ।

३. पौडीको महिला २०० मिटर फ्रिस्टायलको हित चरणमा डुवाना लामाले निर्धारित दुरी २ मिनेट २०.७४ सेकेन्डमा पूरा गर्दै सहभागी ३१ खेलाडीमध्ये ३०औँ स्थानमा ।

४. पौडीको पुरुष १०० मिटर फ्रिस्टायलमा एलेक्जेन्डर गाडेगार्ड शाहले ५१.९१ सेकेन्डको प्रदर्शन गर्दै आफ्नै नाममा रहेको ५२.१७ सेकेन्डको कीर्तिमानमा सुधार गरेको ।

५. ब्याडमिन्टनको पुरुष सिंगल्समा प्रिन्स दाहाल समूह ‘पी’को पहिलो खेलमा विश्व नम्बर वान डेनमार्कका भिक्टर एक्सेल्सेनसँग २१–८ र २१–६ ले पराजित । दोस्रो खेलमा विश्व वरीयताको ४३औँ स्थानमा रहेका आयरल्यान्डका हात गुयेनसँग २१–७, २१–५ तथा तेस्रो खेलमा ५८औँ विश्व वरीयताका इजरायलका मिसा जिल्बरम्यानले प्रिन्सलाई २१–१२, २१–१० को सोझो सेटमा पराजित ।

६. जुडोको महिला ५७ केजीमुनि मनीता श्रेष्ठ प्रधान सर्बियाकी मरिका पेरिसिकसँग १०–० (इप्पोन)ले पराजित ।

७. एथलेटिक्सको महिला म्याराथनमा सन्तोषी श्रेष्ठ ७९औँ स्थानमा । विभिन्न राष्ट्रका ९१ खेलाडी सहभागी म्याराथनमा ८० जनाले मात्र निर्धारित दुरी ४२.१९५ किलोमिटर पूरा गरेको । ११ प्रतिस्पर्धीले दौड नै पूरा गर्न सकेनन् । सन्तोषीले निर्धारित दुरी २ घण्टा ५५ मिनेट ०६ सेकेन्डमा पूरा गरेको ।