काठमाडौं । बंगलादेशमा हडतालमा उत्रिएका प्रहरी अधिकारीहरूले आन्दोलन फिर्ता लिएको घोषणा गरेका छन् । आन्दोलनरत प्रहरीका प्रतिनिधि इन्स्पेक्टर जाहिदुल इस्लाम र हवल्दार शोएब हसनले आइतबार गृह मन्त्रालयमा भएको बैठकपछि आन्दोलन फिर्ताको घोषणा गरेको ढाका ट्रिब्युनले जनाएको छ ।

आफूहरूले राखेका अधिकांश माग पूरा हुने आश्वासन पाएपछि अब सबैजना आआफ्नो जिम्मेवारीमा फर्कने आशा अपेक्षा गरिएको प्रहरी अधिकारीले बताएका  छन् ।

प्रदर्शनका क्रममा प्रहरी र विद्यार्थीबीच देशभर झडप भएपछि बंगलादेश प्रहरी अधीनस्थ कर्मचारी युनियनले अगस्ट ६ मा बन्दको घोषणा गरेको थियो ।

गृह मन्त्रालयमा गृह मामिला सल्लाहकार ब्रिगेडियर जनरल (निवृत्त) एम सखावत हुसैनको अध्यक्षतामा भएको बैठकमा प्रहरी महानिरीक्षक (आईजीपी), र्याबका महानिर्देशकसहित अन्य अधिकारीहरूको सहभागिता थियो ।

विद्यार्थी आन्दोलनका क्रममा दर्जनौँ प्रहरी अधिकारी मारिएका छन् भने कैयौँ घाइते भएका छन् ।

प्रदर्शनमा उत्रिएका प्रहरी अधिकारीहरूले प्रहरी प्रतिष्ठानमा भएका आक्रमणमा संलग्नलाई कारबाही हुनुपर्ने माग गरेका थिए । साथै, आन्दोलनका ज्यान गुमाएका प्रहरी अधिकारीका परिवारलाई एकपटक आर्थिक क्षतिपूर्ति दिनुपर्ने, प्रहरी भर्नामा पारदर्शिता हुनुपर्नेसहितका माग राखेका थिए ।