काठमाडौं । नेपाली कांग्रेसकी केन्द्रीय सदस्य प्रतिमा गौतमले संविधान संशोधन गर्दा समावेशी र समानुपातिक व्यवस्था ‘मार्न नहुने’मा जोड दिएकी छन् ।

सानेपामा जारी पार्टी केन्द्रीय समितिको आइतबारको बैठकमा उनले कांग्रेस र नेकपा (एमाले)बीचको नयाँ गठबन्धन र सरकारको साझा एजेन्डा स्पष्ट रूपमा जनताले थाहा पाए विश्वास बढ्ने उल्लेख गरिन् । उनले सहमतिको मुख्य बुँदा संविधान संशोधन भएको भन्दै यसमा इमानदार भएर लाग्नुपर्ने धारणा राखिन् ।

“समावेशी, समानुपातिक व्यवस्था यस संविधानको मूलमर्म हो । यसमा सरकार इमानदार हुनुपर्छ । समावेशी र समानुपातिक व्यवस्था संविधान संशोधन गर्दा नमरोस्‚” बैठकमा उनले भनिन् ।

प्रतिनिधिसभा सदस्य समेत रहेकी गौतमले महिला अधिकार र सहभागिताबारे सिंगो केन्द्रीय समिति अनुदार बन्न खोजेको हो ? भन्दै प्रश्न गरिन् । “संविधानमा गरिएको व्यवस्थाअनुसार महिलालाइ कति अधिकार सुनिश्चित गरेका छौँ ? महिलाले अवसर पाएनन्‚” उनले भनिन्‚“महिला भएर हामीले मात्र बोल्नुपर्ने हो कि सिंगो कांग्रेसले जिम्मेवारी लिएर बोल्ने हो ? महिलाप्रति कांग्रेस अनुदार छ भन्ने प्रश्न आइरहेको छ, कांग्रेस पार्टीले किन जवाफ नदिने ? हामीले मात्र डिफेन्स गर्ने हो ?”

भातृसंस्थाको ‘जम्बो’ समिति बनाइए पनि संगठन चुस्त र चलयमान बन्न नसकेको उनले औँल्याइन् । पार्टीभित्र एउटै मुद्दामा फरक–फरक कारबाही किन हुन्छ ? भन्ने प्रश्न पनि उनले गरिन् ।