काठमाडौं । भुटानको पारो फुटबल क्लबमा आबद्ध खेलाडी एएफसी च्यालेन्ज लिग छनोटको प्लेअफ खेल्न शनिबार बिहान नेपाल आइपुगेका छन् । चर्च ब्वाइज युनाइटेड क्लबका अध्यक्ष रुबेन राईसहितका पदाधिकारीले टिमलाई त्रिभुवन अन्तर्राष्ट्रिय विमानस्थलमा स्वागत गरे ।

भुटानको लिग च्याम्पियन पारो योपटक निकै प्रभावशाली रहने अनुमान गरिएको छ । उसले जापानका स्टार केसुके होन्डालाई टिममा भित्र्याएको छ । होन्डाले तीनपटक विश्वकप खेलिसकेका छन् । उनी एसियाकै स्टार खेलाडी हुन् ।

होन्डा मात्र होइन, योपटक पारोले कुल १२ विदेशी खेलाडी आबद्ध गर्दै टिम मजबुत बनाएको छ । क्लबले गरेको लगानी अत्यधिक छ । यही कारण जित्नैपर्ने टिममाथि दबाब समेत छ । तयारी पनि उत्कृष्ट रहेको र होन्डाको आगमनले टिम आत्मविश्वासी बनेको प्रशिक्षक पुष्पलाल शर्माले बताए ।

गत वर्ष पनि पारो एफसी कप छनोट खेल्न नेपाल आएको थियो । त्यतिखेर मच्छिन्द्र फुटबल क्लबसँग पारो पराजित भएको थियो । योपटक भने टिम पेपरमा निकै मजबुत देखिएको छ ।

सहिद स्मारक ‘ए’ डिभिजन लिग च्याम्पियन चर्च ब्वाइजसित योपटक पारोले प्रतिस्पर्धा गर्दै छ । खेल आउँदो मंगलबार हुनेछ । दशरथ रंगशालामा साँझ ६ बजे खेल सुरु हुनेछ । न्युज एजेन्सी नेपाल