काठमाडौं । बंगलादेशमा गाजीपुरको काशिमपुर कारागारबाट २०९ कैदी भाग्न सफल भएका छन् । कारागारका सुरक्षाकर्मीलाई बन्धक बनाएर उनीहरूले जेलबाट भागेका हुन् । त्यसक्रममा तीन लडाकुसहित ६ जनाको मृत्यु भएको छ । 

मंगलबार दिउँसो एक समूहले कारागार अगाडि आएर प्रदर्शन गर्न थालेपछि घटना भएको हो । सुरुमा केही कैदीले जेलका एकजना गार्डलाई बन्धक बनाएर कैदीहरूलाई रिहा गर्न माग गर्दै विरोध प्रदर्शन गरेका थिए । सुरक्षाकर्मीहरूले उनीहरूलाई शान्त पार्ने प्रयास गरे पनि सफल भएन ।

कैदीहरूले जेलमा विरोध थालेको जानकारी पाएपछि उनीहरूका आफन्त गेटमा जम्मा भएर नाराबाजी गरेका थिए । त्यसपछि प्रदर्शनकारीहरूले जेलबाहिर रहेको जुट गोदाममा आगो लगाएको ढाका ट्रिब्युनले जनाएको छ ।

त्यसैक्रममा कैदीहरू भागेको जनाइएको छ । दिउँसो करिब साढे १ बजेतिर सेना हेलिकोप्टरमार्फत कारागार पुगेर स्थिति नियन्त्रणमा लिएको थियो ।

बुधबार बिहानदेखि काशिमपुर कारागारमा थप सैनिक तैनाथ गरिएको छ । अहिले स्थिति नियन्त्रणमा छ ।