काठमाडौं । घरेलु कोर्टमा जारी काभा महिला भलिबल नेसन्स लिगमा मंगलबार इरानविरुद्धको दोस्रो सेमिफाइनल नेपालका लागि केही फरक थियो । लिग चरणमा इरानसँग २–३ को हार बेहोरेको ४८ घण्टामात्रै पुग्दै थियो । यही बदलाको भावना नेपाली टिमका हरेक खेलाडीमा छरपस्टै थियो ।

मध्यपूर्वी प्रतिद्वन्द्वी इरानलाई ३–० को सोझो सेटमा जित्दै बदला पूरा गरेपछि त्रिपुरेश्वरस्थित राष्ट्रिय खेलकुद परिषद् (राखेप) परिसरमा रहेको कभर्ड हलमा ‘नेपाल’, ‘नेपाल’को आवाजले गुन्जयमान बन्यो ।

यो सेमिफाइनलको अघिल्लो दिनमात्रै ‘सेमिफाइनलमा इरानलाई सोझो सेटमा हराउँछौँ’ भन्ने प्रतिक्रिया थियो, नेपाली टिमका प्रशिक्षक जगदीश भट्टको । प्रशिक्षकको प्रतिकृयामा मंगलबार नेपाली टिम अडिग रह्यो । भट्टले भनेझैँ नेपाल सोझो सेटमा जितसहित प्रतियोगिताको फाइनलमा पुग्यो ।

“इरानसँगको हारले आज सफलता पाएको जस्तो मलाई लाग्छ । मेरो सिक्थ सेन्सले सोझो तीन सेटमा जित्छौँ भन्ने थियो । त्यसैअनुसार खेलाडीलाई काउन्सिलिङ गरेका थियौँ । नेपाल भलिबल संघले घरेलु कोर्टमा यति ठूलो प्रतियोगिता गरेको छ । हामीलाई आज जित्नैपर्ने दबाब थियो,” खेलपछि प्रशिक्षक भट्टले यसरी विजयी भावना पोखे ।

नेपालले पहिलो सेट २५–२१ ले आफ्नो पक्षमा राखेको थियो । पहिलो सेटको पहिलो अंक इरानको नाममा रह्यो । सुरुआती अंकपछि आक्रामक बनेको इरानले ५–१ को अग्रता बनाएपछि नेपाली टिमका प्रशिक्षक भट्टले पहिलो टाइमआउट लिए । टाइमआउटबाट इरानको लय भंग गर्ने रणनीतिमा सफल पनि बने ।

पहिलो टाइमआउटपछि नेपाली टिमले लगातार पाँच अंक जोड्दै स्कोर ६–५ ल्यायो । लगातार अंक गुमाएपछि दबाबमा आएको इरानले लगत्तै पहिलो टाइमआउट लियो । तर, यसपछि पनि नेपाली टिमको अंक रफ्तारमा कमी आएन ।

पहिलो सेटमा १६–१० ले पछि परेपछि इरानी टिमले दोस्रोपटक टाइमआउट लियो । दोस्रो टाइमआउट पछि इरानी टिमले नौ अंक जोड्दा नेपालले ६ अंकमात्रै स्कोरबोर्डमा थप्न सक्यो ।

स्कोर २२–१९ हुँदा नेपाली टिमका प्रशिक्षक भट्टले दोस्रो टाइमआउटको प्रयोग गर्दै इरानको यो लय रोक्ने प्रयास गरे । उनी यो रणनीतिमा पनि सफल बने । दोस्रो टाइमआउटपछि इरानले एक अंकमात्र जोड्दा नेपालले तीन अंक जोड्दै सेट आफ्नो पक्षमा राख्यो ।

पहिलो सेटमा नेपाली टिमले सर्भिसबाट दुई अंक इरानलाई दियो । नेपालकी सुमित्रा रेग्मी पहिलो सेटमा सर्भिसबाट पाहुना टिमलाई अंक दिने एकमात्र खेलाडी बनिन् । यता, इरानी टिमले भने पहिलो सेटमै सर्भिसमा भएको गल्तीबाट नेपाललाई चार अंक दिएको थियो ।

दोस्रो सेट खेलकै सबैभन्दा रोमाञ्चक र तनावपूर्ण बन्यो । दोस्रो सेटमा पनि पहिलो अंक इरानी टिमले नै लिए । तर, सुरुआतमा ४–६ ले पछि परेपछि इरानी टिमले पहिलो टाइमआउट लिने निर्णय लियो । दोस्रो सेटमा १५–१२ ले अघि रहँदा नेपाली टिमका प्रशिक्षक भट्टले पहिलो टाइमआउट लिने निर्णय गरे । तर, यसपछि नेपालले तीन अंक जोड्दा इरानले पाँच अंक जोड्दै दबाब थपेपछि प्रशिक्षक भट्टले दोस्रोपटक टाइमआउट लिए ।

खेलको कुनै समय १६–१२ को स्कोरसहित चार अंकको अग्रता लिएको नेपालविरुद्ध यसपछि भने इरान टिम हाबी बन्दै गयो । यसपछि नेपालले दुई अंक जोड्दा इरानले पाँच अंक जोड्दै दबाब थपेपछि प्रशिक्षक भट्टले दोस्रो टाइमआउट लिए । तर, यसपछि पनि इरानी टिमको अंक आउने क्रम रोकिएन । 

स्कोरबोर्डमा नेपालले २१ अंक जोड्दा इरान २४ अंकसहित सेट जित्न एक अंकमात्र पछि थियो । तर, यसपछि नेपाली टिमकी स्पाइकर उषा भण्डारीले आक्रमणबाट लगातार तीन अंक जोडेपछि नेपालले स्कोर २४–२४ को बराबरीमा ल्याएको थियो । यसपछि पनि इरानले दुई पटक सेट प्वाइन्टको अवसर बनाएको थियो । तर, दुवै अवसरमा इरानी टिम सफल बन्न सकेन । नेपाल २५–२६ ले पछि पर्दा लगातार स्पाइकर निरुता ठगुन्नाले लगातार तीन अंक जोडेपछि नेपाली टिमले उत्कृष्ट पुनरागमनसहित दोस्रो सेट जितेको थियो ।

दोस्रो सेटमा इरानी टिमको सर्भिस खेलकै सबैभन्दा खराब रह्यो । यो सेटमा इरानले सर्भिस ‘मिस्टेक’ बाट कुल ६ अंक नेपाललाई दिएको थियो । नेपालले दोस्रो सेटमा सर्भिस गल्तिबाट दुई अंक इरानी टिमलाई दियो । यो सेटमा नेपालकी कप्तान अरुणा शाही र सुमित्राले समान एक पटक सर्भिसमा ‘मिस्टेक’ गरे ।

तेस्रो सेट २५–२० ले जितेपछि नेपाली टिमले उपाधि भिड्न्तमा चिरप्रतिद्न्दी भारतसँगको भेट पक्का गरेको हो । तेस्रो सेटको पहिलो अंक लिएको इरानले सुरुआती १० अंक जोड्दा नेपालले सात अंकमात्रै जोडेको थियो । अंकमा ७–१० ले पछि परेपछि नेपाली टिमका प्रशिक्षक भट्टले पहिलो टाइमआउटको प्रयोग गरेका थिए ।

यसपछि भने नेपालले १८ अंक जोड्दा इरानले १० अंकमात्रै थप्न सक्यो । प्रशिक्षकले पहिलो टाइमआउटको प्रयोग गर्दासम्म इरानले १६–१७ को स्कोरसहित एक अंकले मात्र पछि थियो । तर, यसपछि इरानले चार अंक जोड्दा नेपालले आठ अंक जोड्दै सेट आफ्नो पक्षमा राख्यो ।

अब उपाधि भिड्न्तमा बुधबार अपराह्न ५:१५ बजे नेपालले भारतविरुद्ध प्रतिस्पर्धा गर्ने छ । लिग चरणमा भारतलाई ३–२ को सेटमा हराउँदै इतिहास रचेको नेपाल फाइनलमा अझ उत्कृष्ट जिते निकाल्ने लक्ष्यमा छ । प्रशिक्षक भट्ट फाइनल नजिते भारत र इरानलाई हराएको कुराले महत्त्व नराख्ने बताउँछन् ।

“राष्ट्रिय खेलको गरिमा बढाउन टिमले उपाधि जित्नपर्ने नै हुन्छ । हामीले हिजो इन्डियालाई हरायौँ, इरानलाई हरायौँ भन्ने कुराले सरोकार राख्दैन,” प्रशिक्षक भट्टले भने, “सेकेन्ड सेटमा हामी २१–२४ ले पछि थियौँ । यस्तो मानसिकतासहित खेलाडीले खेले भने गोल्ड मेडल भित्तामा छ, झुन्ड्याउन पाइन्छ ।”

नेपाली टिमकी कप्तान अरूणा सेमिफाइनलमा इरानविरुद्ध हाबी बनेर खेल्ने रणनीतिअनुसारको नै प्रदर्शन भएको बताउँछिन् ।

“आज हाम्रो मानसिकता नै डोमिनेट गरेर खेल्नुपर्छ भन्ने थियो । त्यसले पनि हामीलाई सहयोग गर्‍यो । यही मानसिकताले गर्दा दोस्रो सेटमा २१–२४ ले पछि पर्दा पनि जित्न सफल बन्यौँ,” अरूणा भन्छिन् ।

उनी भारतसँग फाइनल खेल्न नेपाली टिम सधैँ उच्च उत्साहमा हुने बताइन् । “अरू टिमसँग भन्दा भारतसँग खेल्न हाम्रो टिम नै बढी एक्साइटेड हुन्छ । यी दुई टिमबीचको प्रतिद्वन्द्वत्माक सम्बन्धले पनि राम्रो खेल्नुपर्छ भन्ने मानसिकता हुन्छ । फाइनलमा भारत अझै बलियो बनेर आउँछ जस्तो लाग्छ ।”

तस्बिरहरू : हरिशजंग क्षेत्री/बाह्रखी