काठमाडौं । प्रधानमन्त्री केपी शर्मा ओलीले अख्तियारमा राजनीतिक नियुक्ति नभएको बताएका छन् । नेपाली कांग्रेसकी सांसद सरिता प्रसाईंले अख्तियारमा राजनीतिक नियुक्ति हुँदा जनविश्वास घटेको भन्दै राजनीतिक नियुक्ति रोक्न आग्रह गरेकी थिइन् । 

अहिले सत्तारूढ दलहरू नेपाली कांग्रेसका सभापति शेरबहादुर देउवा र प्रधानमन्त्री ओली राजनीतिको अन्तिम चरणतिर पुगेको भन्दै दुईजनाले अबको समय राजनीतिलाई सिस्टमभित्र छिराउन समय खर्चिन आग्रह गरेकी थिइन् । उनको जवाफमा प्रधानमन्त्री ओलीले अख्तियारमा राजनीतिक नियुक्ति नै नभएको बताएका हुन् ।   

“अख्तियारमा राजनीतिक नियुक्ति भएको छैन । कर्मचारीतन्त्रमा खारिएर माझिएर आएका व्यक्तिहरू छन् । संसदीय सुनुवाइ भई गुजारेर आएका छन् । सबका सब बदर हुनुपर्छ भनेर हुँदैन,” प्रधानमन्त्री ओलीले भने, “संसदीय सुनुवाइबाट आएका छन् ।”

उनले संसदीय सुनुवाइबाट प्रधानन्यायाधीश र निर्वाचन आयुक्त अस्वीकृत भएको भन्दै सुनुवाइ चाहिँदैन भन्नेका लागि त्यो जवाफ हुने बताए ।

“प्रधानन्यायाधीश, निर्वाचन आयुक्तलाई सुनुवाइ समितिले रिजेक्ट गरेको छ । सुनुवाइ समितिले काम गरेको छ, उजुरी आह्वान गरेको छ । त्यही उजुरीमाथि आमनेसामने राखेर छलफल गर्छ,” प्रधानमन्त्री ओलीले भने, “सुनुवाइ समितिको काम छैन भन्थ्यो, त्यो पनि अहिले असत्य भयो । अहिले काम गरेको छ ।” 

उनले आफ्नो मान्छे राखेर मेरिटोक्रेसीको अभ्यास भएको पनि देखिएको बताए । रास्वपाले राजदूत नियुक्तिमा देखाएको मेरिटोक्रेसी भन्दै उनले व्यंग्य समेत गरे । “आफ्नो मान्छे राखे ‘मेरिटोक्रेसी’ नभए नहुने हुँदैन । अहिलेको समय मान्छे आफ्नो छान्ने हैन, समक्ष र योग्य परिणाम दिन सक्ने मान्छे छान्ने हो,” ओलीले भने, “म माननीयज्यूलाई सोध्न चाहन्छु कसैलाई सिफारिस नगरेको, 'आफ्नो मान्छे' नबोकेको माननीय हुनुहुन्छ कि हुनुहुन्न ? कति हुनुहुन्छ ?”

प्रधानमन्त्रीको यस्तो प्रश्नपछि समितिमा हाँसो छुटेको थियो ।

हाँसोकै क्रममा मेरिटोक्रेसीवालाले अन्तर्वार्तामा बोलाएर परिचयसँग सम्बन्धित प्रश्न मात्र सोधेर पठाएको उल्लेख गरे । उनले सबै प्रश्न मिलाएर फर्किएका मान्छे किन फेल भए भन्दै प्रश्न गरेका थिए ।