काठमाडौं । मिडिया काउन्सिल विधेयक, २०८० को नाम आमसञ्चार परिषद् विधेयक राख्ने संसदीय समितिमा सहमति जुटेको छ ।

राष्ट्रियसभाअन्तर्गतको विधायन व्यवस्थापन समितिको मंगलबारको बैठकमा उक्त विधेयकमाथि दफावार छलफल गरिएको थियो । सोही बैठकमा त्यसको नाम आमसञ्चार परिषद् विधेयक राख्ने सहमति जुटेको हो ।

समिति सदस्यहरूले मिडिया काउन्सिल नाम अंग्रेजीबाट भएको भन्दै नेपालीकरण गर्न प्रस्ताव गरेका थिए । सदस्यहरूले नाम नेपालीकरण गरिनुपर्नेमा जोड दिएका थिए ।

सरकारका प्रवक्ता समेत रहेका सञ्चार तथा सूचना प्रविधिमन्त्री पृथ्वीसुब्बा गुरुङले पनि नाम नेपालीकरण गर्न सरकार तयार रहेको बताएका थिए । योसँगै मिडिया काउन्सिल विधेयकको नाम आमसञ्चार परिषद् विधेयक राख्न सहमति जुटेको समितिका सभापति जयन्तीदेवी राईले घोषणा गरिन् ।

अब परिवर्तित नामअनुरूप बाँकी प्रक्रिया अगाडि बढाइने उनले बताइन् । उनले विधेयकको नाम परिवर्तन गरेको नभई नेपाली भाषालाई जोगाउने उद्देश्यसहित नेपालीकरण गरिएको स्पष्ट पारिन् । विधेयकका विषयवस्तु भने परिवर्तन नहुने उनको भनाइ छ ।

“भाषा जोगाऊँ भन्ने हिसाबले नाम नेपालीकरण गरेको हो । आमसञ्चार परिषद् विधेयक नाम हुने भयो,” उनले भनिन्, “त्यसभित्रको कन्टेन्टहरू परिवर्तन हुँदैन । नाम आमसञ्चार परिषद् राख्ने कुरामा सहमतिजस्तै भयो ।”

सभापति राईले उक्त विधेयक सञ्चार क्षेत्रलाई सरकारले नियन्त्रण गर्ने गरी ल्याइएको भन्ने सरोकारवालाको गुनासो रहेको उल्लेख गरिन् । कुनै हालतमा सञ्चार क्षेत्रलाई नियन्त्रण गर्न नदिइने उनले बताइन् । न्युज एजेन्सी नेपाल