काठमाडौं । अभिनेता राजेश हमालले आइतबार राति ९ बजेतिर सामाजिक सञ्जालमा एउटा स्टाटस पोस्ट गरे । पाँच तस्बिरसहित उनले लेखे– लामो अन्तरालपछि दिवाकर भट्टराईले निर्देशन गर्ने चलचित्रमा काम गर्दै छु ।

तस्बिरमा निर्देशक दिवाकरसँग छन् उनी । राज कट्वाल पनि छन्, राजेश र दिवाकरसँग ।

राजेशले पोस्ट गरेकै समयको सेरोफेरोमा दिवाकरले पनि फेसबुकमा लेखे, “महानायक (राजेश हमाल)सँगको यो तस्बिरले ममा एउटा विशेष चुनौती थपिएको छ । यो विश्वास र भरोसालाई एउटा उचाइ दिनेछु । आभारी छु महानायक राजेश हमालप्रति, मलगायत मेरो टिमलाई विश्वास गर्नुभएकोमा । केही विशेष पक्कै हुनेछ ।” 

राजेशले चलचित्रमा अभिनय नगरेको थुप्रै भइसकेको छ । ‘शकुन्तला’ उनले अभिनय गरेको अन्तिम चलचित्र हो । त्यो करिब आठ वर्षअगाडि रिलिज भएको थियो । दिनेश श्रेष्ठले निर्देशन गरेको उक्त चलचित्रमा उनी तेस्रोलिंगी महिलाको भूमिकामा थिए । ठूलो अपेक्षा र विश्वाससहित त्यो सिनेमा रिलिज गरिए पनि चालचित्रले दर्शकको मन जित्न सकेन । दर्शक ‘शकुन्तला’ हेर्न हल गएनन् ।

त्यसअघि, बिग बजेट र ठूलो प्रचारसहित राजेशको चलचित्र ‘वाग्मती’ आएको थियो । त्यसले पनि न राम्रो समीक्षा पायो न त दर्शकको साथ । राजेशको कमब्याक भनेर पब्लिसिटी गरिएका ती चलचित्र समीक्षात्मक र व्यापारिक दुवै हिसाबले असफल भएपछि उनले सेतो पर्दाबाट नै ब्रेक लिए । त्यसपछि उनले आठ वर्ष ब्रेक लिएका हुन् ।

अपेक्षा गरिएका चलचित्र लगातार नचलेपछि बाह्रखरीसँगको एक अन्तर्वार्तामा राजेशले भनेका थिए, ‘मैले काम गरेका केही चलचित्रमा सायद सेलेक्सन सही भएन । अब यसमा मैले ध्यान पुर्‍याउनुपर्छ ।’

उनले समय परिवर्तन हुँदै गएको र दर्शकको रुचि पनि बदलिएकाले त्यसतर्फ आफूले ध्यान दिएको बताएका थिए । उनको भनाइको तात्पर्य थियो, समयानुकूल परिवर्तनको विकल्प छैन । बाह्रखरीसँगको कुराकानीमा उनले नयाँ सिनेमा आफैँ बनाउन सक्ने पनि बताएका थिए ।

‘शकुन्तला’ रिलिजपछि राजेशले सिनेमामा काम गर्ने धेरै हल्ला चल्यो । तर, उनले काम गरेनन् । यहीबीचमा उनले आफैँ चलचित्र बनाउने उद्घोष गरे । उनले राम्रो कथामा मात्र काम गर्ने बताए । चर्चाको केन्द्रमा रहे पनि आठ वर्षसम्म उनले सिनेमाको काम गरेनन् । न अर्काको चलचित्रमा काम गरे न आफैँले बनाए ।

कथा छानेर मात्र काम गर्ने बताएका राजेश खेल्न तयार भएको चलचित्रको नाम भने हालसम्म सार्वजनिक गरिएको छैन । निर्देशक दिवाकरले अनटाइटल यो प्रोजेक्ट एक्सन ड्रामा हुने बताएका छन् ।

दिवाकर राजेश हमालको सानदार कमब्याक हुने जिकिर गर्छन् । राजेश स्क्रिप्ट सुनेर काम गर्न तयार भएको उनी बताउँछन् ।

“राजेश दाइको आफ्नै खालको सम्मान र व्यक्तित्व छ । त्यसैले उहाँलाई गर्विलो कमब्याकको जरुरी छ । उहाँले अब खेल्ने फिल्म धेरै किसिमले विशेष हुनुपर्छ,” दिवाकार भन्छन्, “राजेश दाइको पपुलारिटी र उहाँको व्यक्तित्वका कारण हिजोका सिनेमाभन्दा फरक हुनुपर्छ । त्यसैले हामीले त्यही खालको स्क्रिप्ट तयार पारेका छौँ ।”

नेपाली चलचित्र उद्योग र राजेश स्वयंका निम्ति पनि यो सिनेमाले फाइदा गर्ने उनको भनाइ छ । मेकिङका हिसाबले चलचित्र अब्बल हुने उनले बताए । यसमा तीन करोड रुपैयाँभन्दा बढी बजेट लाग्ने उनले जानकारी दिए ।

सिनेमाबाट ब्रेक लिए पनि काँचको पर्दामा राजेश छायामा परेनन् । आठ वर्षको बीचमा उनी गीतका भिडियो र टेलिभिजन कार्यक्रममा बेलाबेलामा आइरहे । टेलिभिजनबाट प्रशारित ‘को बन्छ करोडपति’, ‘जातको प्रश्न’ कार्यक्रम उनले होस्ट गरेका थिए ।

चलचित्रमा काम गर्छु भन्दै नगरे पनि काँचको पर्दामा उनको सक्रियता रहिरह्यो । उनले थुप्रै म्युजिक भिडियोमा अभिनय गरे । लोकगीत होस् वा आधुनिक उनले म्युजिक भिडियोमा अभिनयलाई निरन्तरता दिइरहे । त्यसले उनलाई दर्शकमाझ पुर्‍याउन सहयोग गर्‍यो ।

गीतका भिडियोमा अभिनय मात्र गरेनन्, राजेशले आफैँ गीत पनि गाए । ‘मन बुढो भएन’ बोलको गीतमा उनी आफैँले स्वर दिए ।

‘युगदेखि युगसम्म’बाट करिब ३३ वर्षअघि नेपाली रजतपटमा डेब्यु गरेका राजेशले करिब २०० चलचित्रमा अभिनय गरिसकेका छन् ।

• आठ वर्षपछि ‘कमब्याक’ गर्ने चलचित्रमा राजेशले कति लिए पारिश्रमिक ?

कुनै समय थियो, पोस्टरमा राजेशको तस्बिर मात्र भए पनि दर्शक सिनेमा हलसम्म पुग्थे । तर, समय फेरियो । आर्य फेसको सुगठित शरीर भएको व्यक्ति मात्र सिनेमाको हिरो भन्ने मानक भत्कियो । दयाहाङ राई, सौगात मल्ल, विपीन कार्की, विल्सन विक्रम राईलगायत कलाकार स्टार भए । सिंगल थिएटर बन्द भए । मल्टिप्लेक्स खुले । लार्जर देन लाइफ सिनेमा चल्न छोडे । विषयप्रधान सिनेमा दर्शकको रोजाइमा परे । राजेशका सिनेमा धेरै चल्न छोडे । त्यसपछि ब्याक भएका उनी अहिले कसरी चलचित्र खेल्न राजी भए ?

राजेशको कमब्याकको यो समय उचित भएको दिवाकर जिकिर गर्छन् । सिनेमाको ट्रेन्ड चेन्ज हुने समय भएको उनी बताउँछन् । राजेशको पालामा जस्ता सिनेमा थिए, त्यसपछि विषयप्रधान आएका र अब पुनः लार्जर देन लाइफ लाउड सिनेमा रोजाइमा पर्न थालेका उनको टिप्पणी छ ।

“हरेक १० वर्षमा सिनेमाको प्यार्टन चेन्ज हुन्छ । वर्ल्ड सिनेमा हेर्ने हो भने पनि यसलाई पुष्टि गर्छ,” उनी भन्छन्, “भारतमै हेर्ने हो भने ‘पठान’, ‘जवान’, ‘एनिमल’ चलिरहेका छन् । बलिउडमा जुन प्यार्टन चलिरहेको छ, नेपालमा त्यस्तै हावा चलिरहेको छ ।”

भारतमा ‘प्याड म्यान’ चल्दा नेपालमा ‘लुट’, ‘कबड्डी’जस्ता विषयप्रधान चलचित्र चलेका थिए । हाल लार्जर देन लाइफ सिनेमा चल्ने समय आएको उनको भनाइ छ । नेपालमा लार्जर देन लाइफ सिनेमा हेर्ने दर्शक रहेका र त्यसका निम्ति राम्रा चलचित्र आवश्यक रहेको आफ्नो निष्कर्ष उनी सुनाउँछन् ।

पछिल्लो समय नेपालमा पनि एक्सन सिनेमा बनाउन थालिएको र यसले चलचित्र उद्योगलाई लार्जर देन लाइफतर्फ डोर्‍याउने उनको भनाइ छ । यो प्यार्टनलाई राजेशले लिड गर्नुपर्ने उनको धारणा छ ।

राजेश हमालको जसरी सानदार आगमन भयो, एक्जिट पनि त्यस्तै हुनुपर्नेमा दिवाकर जोड दिन्छन् । “राजेश दाइले हिजोजस्तो भन्दा पनि क्यारेक्टर र कन्टेनमा बसेर काम गर्नुपर्छ । हिजो हिरोइन बचाउन आउने मात्रै क्यारेक्टर थियो,” उनी भन्छन्, “अब फरक विषयमा काम गरेर आफूलाई क्यारेक्टरमा ढाल्न सक्नुपर्छ । यो चलचित्रमा राम्रो काम गर्न सकियो भने चलचित्र उद्योगसँगै मलाई र राजेश दाइलाई पनि फाइदा हुनेछ ।”

यदि, चलचित्र सफल नभए त्यसको सबैभन्दा ठूलो अपजस आफूले लिनुपर्ने उनी बताउँछन् । त्यसका लागि समेत आफू तयार रहेको उनी सुनाउँछन् । राजेशको दोस्रो इनिङ्सको सुरुआत सानदार बनाउन सक्नु आफ्ना निम्ति ठूलो चुनौती रहेको उनी बताउँछन् ।